سارة فوزى تكتب ل«التحرير»: كلام مصرى جدا «2»

إستكمالا لما تم تناوله في المقال الساخر السابق حول التعبيرات والتشبيهات والمصطلحات التي ابتكرها المصريون واستخدموها في حديثهم و أضرت بلغتنا العربية ناصعة الفصحي " وبهدلت أمها و شرَحتها زي الجثة " سوف نبدأ الجزء الثاني والأخير من هذا الموضوع و لنبحر في جولة هزلية حول تعبيراتنا المصرية غير المنطقية !
وإليكم بعض هذه التعبيرات :
الفتاة التي تتحدث بصيغة المذكر : هناك فئة من الفتيات يتميزن بالاستهبال والاستعباط ويتحدثن بصيغة المذكر ولا أدري السبب ..وكل واحدة إما تجي تتكلم تقولك : " مش عارف ، مش فاهم ، مش عايز" وهلم جرا ومش عارفة أنا إيه اللي يخليها تتكلم بصيغة المذكر ؛ هل من باب الموضة ولا من باب الدلع الزايد ولا من باب التغيير ولا من باب إنها عندها مشكلة في Gender ومش حاسبة نفسها علي الصنف الحريمي؟!!
· جمل متركبة غلط والألش عليها بالعبط : هاولع النور.. طيب اجيب لك جاز !! ، هأيد النور ؟ مفيش هترجل النور!! وأهي كلها أطراف أيد ولا رجل ! ، الدنيا بتمطر ..ياراجل والسحابة واخدة أجازة يعني ، ما تجي نتمشي علي النيل شوية ..ده علي أساس إن النيل سجادة أو موكيتة في بيتكو ، هاقف في الشباك ..حروف الجر مع المصريين معدية ، خد بالك ..لا مش هاخده ولا اخده منين؟ من الجمعية؟ ..ودي أمثلة بسيطة راجعوا مواقف حياتكو هتلاقو كلام مالوش معني وجمل هطلة زي سابقاتها بالهبل.
طيب ، بص ، بقي ، وكده : لوازم كلامية أصيلة و أكثر أربع كلمات يستخدمهم الشعب المصري في حديثه ؛ "طيب" بتتقال في كل وقت لختام الحوار وبيان الموافقة أو الرضا بالأمر الواقع أو لتقصير الكلام ، "بص" لبدء الحوار ويفضل يقولك بص وأنت باصص له أصلا و تبقي عايز تقوله اخلع لك عيني علشان تعرف إنني باصص ؟؟ ، "بقي" دي بقي بالذات بتتقال بقي في كل الكلام أوله ..وسطه ..آخره استخداماتها كتيرة بقي ، "وكده" اللي هو إيه ؟ منعرفهوش يا بيه ما معني كده ؟ ولا ليها أي أصل أو فصل؟؟ المهم بتتقال للعطف مش (عطف الأم علشان الألش الرخيص) ولكن لربط الكلام ببعضه إما الواحد يتزنق حتي شيرين ليها أغنية بتؤكد كلامي بتقولك " بص بقي عشان تبقي عارف " ، (طيب بص بقي) لولا الكلمات الأربعة السابقة كان كتير من كلامنا بقي مش مربوط (وكده) .
· مش تجي ..مش تعمله: فيه شوية بنات (مش) هيموتوا موتة طبيعية لأنهم بيدخلوا كلمة " موش وفي قول آخر مِش " في أي جملة من باب الدلع المقزز أكتر ما (السنافر) نفسيها بتدخل كلمة (سنافر) في كل كلامها ومن بعض أقوالهن : " مش تجي ..مش تعمل كده تاني ..مش تعرف ..مش تولع .." موش" لما ياخدك بقي !
· حياتشي ، حضرتشك : اللي هما أصلا حياتي وحضرتك طبعا فيه مشكلة لدي البعض وخاصة في مجتمعنا المصري ممن ينطقون "تشي وتسي" في كل كلامهم ، الحقيقة الموضوع ده مش عارفين سببه إيه ؛ مشكلة في جهاز النطق ولا مشكلة في الثقافة ولا في البيئة ولا في أي نيلة ؟؟ تحس أنك كمان إما تسمع حد بينطق كده "تشي وتسي" دي بيبهت عليك وتلاقي نفسك وأنت بتتريق عليه بتغلط وبتتكلم زيه في العادي ..ويا داهية دقي علي دماغي وزقي! ده غير بقي اللي بيقولوا:" منطلون اللي هو بنطلون ، ششوار اللي هو سيشوار ، أنارب اللي هي أرانب والأرانب نفسها زهقت من اسمها ، الكركريه اللي هو كركديه ، بطرمان اللي هو برطمان والبقية تأتي وكفاية كده !!"
اعمل نفسك من بنها : يستخدمها من ينصحك بضرورة اتباع أسلوب " كل إما تستعبط اكتر فرصتك في الهروب من البلاوي هتكبر" وهو أسلوب فاشل وعلي أية حال لطالما تساءلت : " إشمعن بنها وليه بيربطوها بالاستعباط وليه بيعملو صورة ذهنية سلبية لأهل بنها ، طيب اللي من بنها بجد يعمل نفسه منين ؟من برشلونة؟؟"
استخدام إفيهات المسرحيات والأفلام بغباء وبكثرة : الشعب المصري شعب درامي بيحب المسرحيات ويعشق الأفلام وحقيقة إن أغلب الشعب المصري بيدخل سينما حاليا مش علشان يتمتع بالقصة أو بالأداء التمثيلي لكن علشان يطلع له بأغنية زي " سلسلة أغاني عبدو موته والبقية تأتي " وكام إفيه يقعد يكتبهم علي الفيس بوك أو يقعد يقرف بيهم أهلك كل إما يجي موقف مشابه فيقول الأفيه ..طيب هو المفروض كل مرة اضحك علي نفس الأفيه ..طب إخيييه!
وإحقاقا للحق هناك إفيهات باقية وخالدة تثير ضحكاتنا مهما تكررت مثل : " بلد بتاعت شهادات صحيح ، خد سوسو بلاها نادية ، اذاكر وانجح الاتنين .." وفيه إفيهات الناس بتمسك فيها وهي رخمة وسخيفة وتحس إنك عايز تقول للي بيقولها : اضحك ولا ابين سناني !
· المعجم الوجيز في قاموس المعيز،وفي قول آخر القاموس الكبير للشباب الخطير : هناك بعض المصطلحات والألفاظ المريبة العجيبة التي يرددها بعض الشباب والشابات علي سبيل الروشنة ومواكبة العصر..أموت واعرف أصلها ولو عرفت – عزيزي القارئ ماهيتها – ياريت تشاركني بالمعلومة وأفيدونا أفادكم الله، وعلي سبيل المثال لا الحصر : " فاكِس ، فكسان ، سرسجي ، ابجني ، أوكشه ، انتخ ، اشتكاح" أنا نفسي اعرف المصطلحات دي مين بجد اخترعها؟؟ يا عيني عليك يا "سيبويه" يا بتاع العربي لو كنت عرفت الكلام ده كنت سيبت علم النحو وعلوم اللغة و كنا سمناك " سابوك ليه".
و زيتونة الموضوع تتمثل في ضرورة المحافظة علي لغتنا من الاندثار في زمن السفهاء عقلا وعلما وخُلقا ووجوب استخدام عامية "المثقفين" وليس عامية" الشوارعجيين " والأهم أن تمعن النظر قليلا وتسأل نفسك : هل قابلت يوما شخصا غربيا يجيد إتقان لغة أخري ولا يجيد الحديث بلغة بلاده ؟!
فمع الأسف تجد في مجتمعنا المصري والعربي من يجيد لغة الآخرين ولا يعرف شيئا عن لغة بلاده وحتي من يعرف لغة بلاده يسئ إليها أكثر ممن لا يتحدث بها..وليس في كلامي دعوة لمقاطعة اللغات الأجنبية بل علي العكس لابد من احترامها وإتقانها ولكن في ظل هذا الاحترام والإتقان لا تنسي لغتك الأم ولا تنسي أنها جزء لا ينفصم عن هويتك وكينونتك وحضارتك..
ببساطة : إحنا بنقول إن الغرب أفضل مننا لأننا عندنا عقدة الخواجة ..وأفضليته علينا سببها إننا شايفينه الأفضل دايما وبنتعامل معاه علي هذا الأساس ..ممكن نكون أفضل من الغرب لو أخدنا عن الغرب كل حاجة كويسة ومتميزة فيهم و اخدنا الحاجات الكويسة اللي فينا وإحنا مش شايفينها أو عارفينها ومش عايزين نشوفها..ناخد الكويس من كل جانب ونمزجه ونطلع مزيج فريد من حضارتنا وتميزنا جايز ننافس بيه الغرب اللي إحنا شايفين أحسن مننا في كل حاجة..
لغتك بصمتك ..لغتك جزء من تفرد شخصيتك ..عايز تبقي نسخة مقلدة للغرب فأنت حر بس العالم بيحب الأصول مش الأشباه ! اللهم بلغت ..اللهم فاشهد..