نصيحة للأحزاب

باعتباري مواطناً له عينان واذنان.. لي طلب عند مسئولي الأحزاب.. بلاش كل ما »تيجو« داخلين علي انتخابات تقولوا لنا »البُقين« بتوع »وضعنا قواعد صارمة لاختيار المرشحين، وسنراعي ان يكون المرشح حسن السمعة«.. وعلشان خاطري سيبكم بالذات من حكاية حسن السمعة دي.. قولوا أي حاجة تانية، ولا اقول لكم نصيحة.. بلاش تقولوا حاجة خالص.. أصل الحكاية ما بقتش »قوالة« والناس كلها بقت عينيها مفنجلة وشايفة وعارفة وسامعة.. القصص والنوادر اللي بتتقال علي النواب.. وبعدين ليه تزنقوا نفسكم وتقولوا احنا رشحنا فلان لان سمعته كويسة.. انتم مغسلين وضامنين جنة.. لأ.. طيب مش هي التجربة اثبتت ان عدد من النواب اللي رشحتوهم بعيدين كل البعد عن الكلام ده.. خلاص لا تقولوا ولا تعيدوا.. والاحسن يتقال انكم ماعرفتوش تختاروا احسن ما يتقال انكم اخترتم الهليبة اصل ممكن قوي ترشحوا واحد كويس لكن المغريات اللي حواليه ممكن تغيره.. ماهم النواب مش انبياء.. يعني بالذمة عاوزين واحد يشوف اللي جنبه »بيستف« الارانب من بيع كام موافقة علي كام تأشيرة ويقعد يتفرج اكيد حيقلده، وخليني احكي لكم علي ناس من النوعية دي.. عندك يا سيدي واحد كان في بداية المجلس »بييجي« بالمواصلات وفجأة اصبح من راكبي السيارات الحديثة فتسأل »منين يا مولانا« فتعرف ان »الأخ« استغل عضويته في الحصول علي موافقة علي 31 فرن »عيش« بأسامي قرايبه، وما ادراك ما »مكسب« فرن العيش.. واحد تاني أول كلمة قالها في المجلس أنا ضد الفساد.. شويتين وخد موافقة علي »حتة« ارض، وعارضها دلوقتي »للبيع« بالملايين.. واحد تالت.. عامل فيها بتاع ربنا.. خد موافقة علي »محجر« لاستخراج مواد البناء.. ماعجبهوش المكسب قام عامل »بوابة« علي الطريق اللي رايح علي المحجر وبقي بياخد علي كل عربية »معدية« 001 جنيه »فِرده«.
وسمعني.. علي بابا بعد الضنا لابس حرير في حرير.