السيسي للشعب المصري: أنتم نور عيوننا ولا يمكن أن ننسى وقفتكم معنا

قام الفريق أول عبد الفتاح السيسي، وزير الدفاع والإنتاج الحربي، بإلقاء كلمة للشعب المصري، خلال احتفالية القوات المسلحة بالذكرى الأربعين بنصر أكتوبر، والتي أقيمت باستاد الدفاع الجوي.
وقال: " عاوز أكلمكم على يوم من أيام العرب مش بس يوم لجيش مصر، ولا حتى يوم المصريين ده يوم لنا جميعا يوم كرامة لكل العرب، جيش مصر والمصريين وأشقائنا العرب ".
وتابع: " فيه شباب كتير لم يعش اليوم ده، كان لنا حلم للمصريين إنهم ياخدوا مكانهم ويكتبوا تاريخ جميل لكن الحلم ده اتكسر سنة 67 وعاش المصريين ومن وراهم العرب آلام كبيرة أوي، واللي يعرفها اللي عاشها وداقها، وأحاول أفكر نفسي وأفكركم عشان نستلهم من الآلام والعبر حتى لا تتكرر الآلام مرة ثانية ".
وقال: " فيه ناس بيقولوا إيه العلاقة بين جيش مصر وشعب مصر، والعلاقة دي مش غريبة ولا حاجة، وعاوز أقولكم إن الشعب كان بيوفر للجيش تفتكروا إن فيه حد يدخل في العلاقة دي بيننا وبين المصريين، أنتم مش عارفين إنكم نور عيوننا ولا إيه؟ " .
وأضاف: " خلوا بالكم إننا اتعلمنا كده في الجيش لا ننسى أبدا لا يمكن أن ننسى وقفتكم معانا، وعشان كده قبل مما تتألموا إحنا نموت الأول لكن أنتم ما تتألموش، لكن وقف الجيش المصري ولا وقف الشعب المصري.. هو مفيش فرق بينهم، الجيش والشعب إيد واحدة ".