احتجاجات على الفيس بوك بعد تحديث احنا اسفين ياريس --

كتب محمد محمود
- احتجاجات واعتراضات.. هذه المرة ليست في واحدة من دول المنطقة حيث أمواج التغيير الثورية.. ولكنها احتجاجات إلكترونية ساخرة بعدما أطلق موقع التواصل الاجتماعي الشهير فيسبوك تحديثاته الجديدة.
التحديث الأخير طال شكل الصفحة الرئيسية للفيسبوك وتقسيماتها وأكثر ما لفت انتباه مستخدمي فيسبوك هو نافذة ticker التي تعرض نشاطات الأصدقاء لحظة بلحظة من كتابة تعليق أو رفع صورة أو أي شيء آخر.
وهذه التحديثات دعت البعض لإطلاق صفحة بعنوان "إحنا آسفين يا فيسبوك " على الموقع نفسه حملت بعض التعليقات الساخرة على التحديثات الأخيرة.
فكان منها أن أطلق البعض اسماً تهكمياً على التحديث الأخير لفيسبوك بخدمة.. "افضحني شكراً" ومميزاتها على حد تعبيرهم:
1- سيرتك ع كل لسان.
2- اي حاجة هتعملها هتتشاف يعني هتتشاف.
أما أحد المستخدمين فكتب تحذيراً تهكمياً: "عزيزي الفايسبوكجي بعد تفعيل الفيس بوك الجديد قبل ما تعمل أي كومنت او لايك فكر ألف مرة الوطن العربي كلو بتتفرج عليك".
وعلّق آخر.. "الفيس بوك دلوقتي بقي عامل زي اتنين ستات قاعدين علي كنبة ساعة مغربية بيجيبوا في سيرة ده وسيرة ديه".
واستلهاماً من الشعارات الثورية الأخيرة دعا آخر إلى.. "مليونية تصحيح مسار الفيس بوك"..!
أما عن groups” " التي تقدم خدمة معرفة زائري صفحة المستخدم الشخصية، كتب مستخدم: "إعرف مين بيشوف بروفايلك ..... يا عم خلاص مصر كلها بتشوفه دلوقتي".
وبالإنجليزية عبر آخر عن عدم استيعابه للتحديث الأخير.. facebook is like women when u start to understand them , they changeأو "فيسبوك مثل النساء، حالما بدأت في فهمهن.. يتغيرن"
كان هناك أيضاً نظرة مستقبلية ساخرة لما سيكون عليه الفيسبوك بهذه الطريقة فكتب البعض:
- قريباً سيكون الفيسبوك كالآتي:
* أحمد توفيق بياخد دش happening now
* ريم حسن مالقتش بيبسي في التلاجة فبعتت أخوها يجيب five minutes ago
* ميادة ووائل بيتكلموا اينبوكس وعمالين يجيبوا في سيرتك happening now
* سامي فاتح ايمى بمشاعرة بس إيمى قلبته ten minutes ago
* رامي قام من ع الفيسبوك ودخل الحمام 30minute ago
* ميرا عطست.
*(يرحمكم الله) click here to send her
* أم محمود بتنده على محمود علشان حطت الأكل على السفرة.
* أبوك طالع على السلم.. اطفي السيجارة وهوي الأوضة.
* محاسن بتغير لأبنها لتالت مرة النهاردة.

البعض الآخر لم يعر بالاً بالتحديث الأخير، فكتب هذا المستخدم متحدياً..
"احنا بالصلاة على النبى كده معندناش أسرار نخبيها و شغلنا كله على عينك يا تاجر وماشيين فى السليم وكما قال الشاعر..
..
فتشنى فتش".