رقيتك يا امه يا بلادي شعر عماد قطري

رقيتك سبعه يا سمره
و عوذتك برب الناس
من الأنجاس
من الوسواس
من الخناس
من الدساس
و م السارق
من الأفاق
و م الحارق قلوب الناس
من الفقر اللي بات كارك
و حالف ما يسبوش دارك
وم الكلب اللي خان الدار
أعذتك بالإله يا امه
من الهجاص
من الرقاص
من الخباص
و م العسكر إذا يسكر
و يرمي رصاص
من القناص
و م الحاوي
اللي بيداوي
جروحنا بالحديد والنار
و م الغاوي نقوط ف الزار
و اعيذك مرتين تاني
من السلفي اللي مش فاهم
من الخلفي اللي يتباهم
و م الإخوان
و م الخوان
و م الطغيان
و م العسكر
و م الساكت
و م العاجز
و م الأهبل
و م المكار
رقيتك مرتين تاني
من اللبرالي مش فاهم
و بيساهم تزيد النار
من العلماني
و العايم على عومهم
و م التابع خطى فلولهم
و م الماسك على هدومهم
و م الراكب على الموجه
و م السارق ضمير الناس
و م الزاعق مع الهوجه
و م النايح بلا احساس
و م الخايف من الأحرار
رقيتك يا امه م الحاسد
و م الفاسد
و الجاحد
و م الناكر جميل النيل
و م السارق ضيا المواويل
و م البايع نجوم الليل
و م الشاري دقيق أغبر
و متسرطن
و م العايق
و متشيطن
و م الحاكم ومتصهين
و م الجاهل
و م الفجار
رقيتك يا امه يا بلادي
من العايقة
و م الساقطة
و م البايعة براءتها
و م الشارية وساختها
وم النايمة على اشاعة
و م القايمة ورا إذاعة
بتكدب ليل
و ف الصبحية لتاتة
و عجانة
بتشعل فتنة ف الأخبار
رقيتك من ولد صايع
و اعلامي بيتمايع
و جرنالجي
يشوف الجرح
يتعولق
و يعمل نفسه مش سامع
و م الكداب
و المرتاب
و م المغتاب لثوارك
و م اللاعن شباب دارك
و لا دارك لهيب النار
رقيتك مرتين تاني
و اعيذك مرتين تاني
و أنا الواقف على جبينك
ولد أسمر
شبه نيلك
أردد في المسا وردي
و ف الصبحية أهدي لك
شذا وردي
و أزين قلبك الوردي
بأشواقي
و أحلامي
و فوق منهم
جناين غار