إزاى تستغل مواهبك؟!

كل واحد فينا عنده امكانيات وطاقات داخلية تخليه شخصيه مؤثره وفعاله في المجتمع... الموضوع كله تعرف انت متميز في ايه وتحاول..... تكبره وتنميه... وياريت تفهموا كلامي صح وميبقاش في سوء نيه في الموضوع
فيه حاجات ممكن تبقي عندك ومش عند غيرك...حاجات بسيطه جدا وتافهه بس تكون سبب في نجاحك من وجهه نظر بعض الناس
ممكن تكون شاب بتلبس بنطلونات حمرا ضيقه وباديهات سبعه كارينا ومسقط البنطلون... والناس تبصلك بأحتقار وتبقي شايفاك عيل غلط..في حين انك لو كملت في الطريق ده وتميزت فيه ممكن في يوم من الايام...تقدم برنامج على التليفزيون المصري زي الاستاذ شريف مدكور
ممكن تبقي تخين جدا والناس بتقولك خس... واعمل دايت..في حين عندك الاستاذ عماد اديب والاستاذ معتز الدمرداش...رموا كلام الناس ورا ضهرهم وكملوا في اللي هما فيه لحد مابقوا نجوم التوك شو.. متهتمش بكلام الناس يمكن كرشك يكون ميزتك.... يديك ثقل قدام الناس وهيبه عمرك ماهتوصلها لو كنت رفيع
ممكن تبقي شاب لسانه طويل زى أي شاب في مصر واخد الموضوع هوايه...في حين انك لو تميزت فيه وابدعت ممكن تبقي زي الاستاذ مرتضى منصور...بتطلع على كل التليفزيونات... وماسكلك إدارة نادي أو اتنين وبتشتم في أحمد شوبير برضه عادي يعني
ممكن نبره صوتك المسرسعه تبقي سر شهرتك.... وتبقي إعلامي كبير زي الاستاذ أحمد موسي
ممكن بسشوار كويس... وعلبه ماكياج محترمه على شويه تمثيل تبقي مذيعه....زي ريهام سعيد
ممكن لو معاك قرشين تنتج فيلم لراقصة جديدة وتبقي منتج كبير وتتحكم في سوق السينما المصريه...زي الاستاذ السبكي...