اهتمامات الشاب المصري!

المشكلة أن البنت في مصر بتبقي فاكرة إنها فاهمة الولد كويس... وده سبب عدم توافق أنثى المصري مع ذكر نفس النوع في كتير من الأحيان
هى بتبقى فاكرة أن اهتماماته ينزل يعمل شوبنج في المهندسيين بالتمن ساعات في جزيرة العرب... أو يروح سيتي ستارز.... يقعد في كافية مع أصحابه يطلب اتشيز كيك ويتكلموا أو يلعبوا اسبين دا بوتل... لما يجوع يطلب سينابون.. لما يجوع أوي ممكن يحط عليها إكسترا أي حاجة من الحاجات اللي محدش عارفها دي... إكسترا بيكان أو واتيفر... بتبقي فاكرة أنه بيبقي مبسوط في الهالويين والكرييسماس ورأس السنة وبيبقي عاوز يحتفل بالهطل ده كله... في حين أن الواقع غير كده
ماتشين pes2014 على لابتوب على قهوة بلدي.... مع سندوتشين سجق كلاب من هاني تلوث بالدنيا ومافيها، الشوبنج بالنسبة له... أي تيشيرت هيمشي على البنطلون الكحلي اللي لسه مضيقة أول امبارح.... ممكن يفضل لابسهم أسبوع رايح جاي بيهم ولا حد من أصحابه هياخد باله أن اللبس عفن عليه بقاله أسبوع.
رأس السنة بتفكره أن سنة فاتت من حياته معملش فيها حاجة.... مفيش شغل مفيش جواز مفيش أمل... وسنة جديدة هتبدأ وهتخلص عادي يعني من غير أي حاجة برضه
يوم ما بيحب يغير حياته... بيوضب أوضته... وبينزل جيم... يلاقي وحوش بتتمرن معاه وهو كتافه واقعة وبينهج وهو بيبص عليهم.. بيغير ويروح البيت ينام.
الشباب دول كائنات بسيطة... لم يجد من يحنو عليه..... عامليه كويس... ماتتنكيش عليه...سيبيه يطلب منك كشكول محاضراتك عشان يصوروا وأنتي متأكده أنه مش هيفتحه ولا هيبص فيه... اديله إميلك عشان يبعتلك الريسرش... اللي هو أولردي معملوش.... لما يبعتلك فرند ريكوست متسيبهوش متعلق كتير بره... الدنيا برد... وأنتي عندك أخوات ولاد..... بعتلك poke اعمليله بوك باك..... اديله رقمك عشان أول مايعرف معاد المحاضرة يكلمك..... خدي منه الشوكولاته اللي هيجبهالك... متحريجهوش.... سايسيه....خليه يجيب آخره... هتلاقيه كائن أليف مفيش منه أي مشكلة.....وشوية 'هيمشي لحاله....
أما لو مش عاوزة ده كله وعاوزة تقطمي معاه... أول مايسألك على الكشكول.... اسأليه عندك شقة؟