الخطوبة خط أحمر

بص يابني النهاردة الجمعة... وفيه شباب كتير أنت ممكن تكون واحد منهم أو تعرف حد منهم مقبلين على خطوة انتو مش قدها... وافتكر أني قولتلكوا مش قدها.. لأنها خط أحمر أما ماتقدرش تخطيه أو تخسر كل شيء عنده!
هتنزل من بيتك وتروح بيت تاني عشان تعمل حاجه هتفضل تندم عليها العمر كله
ولذلك أقدم لك النصائح الآتية
...وأنت رايح تخطب لازم تبقي عارف أن فيه اسكيما معينه الناس كلها بتمشي عليها... وانت برده هتمش عليها من منطلق "هذا ما وجدنا عليه أباءنا وأجدادنا "
أول حاجه في اليوم ده في الغالب..بتبقي جايب قميص جديد...وفي الغالب بيبقي ماركه كويسه...اما البنطلون بتجيب أي حاجه عشان مبيبانش اوي..وبعدين حماك مش هيركز اوي مع نصك التحتاني
تاني حاجه بتجيب تورتايه من ساليه سو كريه.. أو علبه الشوكلاته ام 230 جنيه من باشونيل...أو اكتر بقي حسب الناس اللي انت رايحلهم...وحسب الفلوس اللي اتبقت بعد ماجبت الجزمه والقميص... بس خد بالك.. اوعي تجيب ورد.... اوعي بجد... احنا في مسر يبني... متخليش حماك يبصلك على انك شاب متني وهيستهفأك.. أو يقفش عليك طول القعده عشان عارف أن الورد ده مصيره الزباله ومش هيستفيد بيه بعد ماتتأندل تمشي
تالت حاجه...لو معاك عربيه هتغسلها عشان لو مودي اخوها نزل يوصلك بعد لقاء القمه...يلاقيها مغسوله... ولو مش معاك عربيه فهتوقف مودي جنبك لحد ما تركب تاكسي..عشان يعرفوا أن انت مبذراتي ومبتفرقش معاك الفلوس...مع انك هتركب من آخر الشارع ميكروباص أول فيصل عادي جدا
رابع حاجه..هتقابل راجل رخم وكئيب وفي الغالب هيبقي بشنب وهتسمع كلام كتير من نوعية... والله عصمت.. بتشكر فيك وفي أهلك... واحنا مش هنلاقي أحسن منك... وهيشكر في اأهلك اللي مايعرفهومش.. وفي اأخلاقك اللي هو متأكد أنها متفرقش كتير عن أخلاق مناخير السبكي... بس عامه يعني مفيش مقطف غيرك اتقدم السنه دي فيلا مش مهم أي حد والسلام
خامس حاجه هيحاول بأسئلة ساذجة ومكشوفة يعرف مستواك المادي... قال يعني بيطمن عليك...بس هو من جواه بيبقي عاوز يطمن... لما يجي يقولك انت عليك اوضه النوم والصالون والسفره والمطبخ والأجهزة وانا عليا واحد هاهاها... هل هتقدر تشيل الليله ولا لأ وهتفيص منه
سادس حاجة... كل واشرب على قد ماتقدر ومتتكسفش...عشان لو الموضوع كمل وبقيت من أهل البيت مش هتاكل عندهم غير بقسماط بعد كده وهتحبس بشاي وشاي كشري كمان من غير نعناع اللي هو على أساس انك بقيت من اهل البيت وكده
ولو مكملش وده الاحتمال الأكبر... حيث إن بين كل 8 ارتباطات في حياه الإنسان المصري 7 منهم بيتفركشوا....طبقا لاستبيان رأي عملته مجله ميكي.. اهو تبقي استفدت واكلت وشربت
سابع حاجه بقي لما الموضوع يبوظ عشان اتخانقتوا انت وابوها على مين اللي عليه سلك الدش... وهو قالك سلك الدش دي على العريس معروفه أو واتيفر اتخانقتوا على ايه...وانت قفشت...متزعلش... متبتديش تسمع اغنيه عبد الرحمن محمد لاقعدن على الطريق واشتكي...عشان خاطري متسمعهاش...الطريق كله طينه وهتدهول نفسك... ده حتى عبد الرحمن بقي بيقعد في كوستا دلوقتي
وعاوزك لما الموضوع يبوظ متزعلش وافتكر أن اليوم ده وانت نازل امك بصتلك وقالتلك...روح يابني...ربنا ينجيك من كل ضيقه!