مزااااااد.. ضمير للبيع!

ضماير وسط مزاد
يلا جه الميعاد
مراجيح على سندباد
وتوهة مليا الغمة
بايعين ضمايرنا ليه؟
وسط الا لؤنة وتريه
والسعر يا ناس على نور
لكن البيع في الضلمة
اللي بايعه عشان مدلول
واللي بايعه عشان دلدول
وأبو مصلحته يبيع على طول
يلا يا خلق شوية همة
فتح المزاد... فتح المزاد
الاؤنا.. العدوي.. الا تريه
بيعي يا هانم
شاري البيه
يلا يا بايع للمصلحة
عاوز كام ؟!
تمن البيع هيكون مدبحة
وسط الأيام
معانا ضمير لقطة
استعمال خفيف
مين هيدفع أكتر
ده كان في يوم نضيف
مين هيبيع نفسه لمزاجو
لو المزاج في يوم أحتاجه
يضحى عشانه بقوت العيلة
وكفاية عليهم نص رغيف
نصيحة صريحة..
تمن البيعة زوال النعمة
مزادنا مليان فرص
لا فضايح هنا ولا جورص
البايع شكل الشاري
لا تخاف ولا تحترس
وأدى ضمير اتباع بالغالي
نهب وكدب ده سعره عالي
أشكال ضماير مفتوحالي
والشاري دايما لابس عمة
معانا ضمير سعره رخيص
بيقول أوشك ع التفليس
بيكبش وبيملا الكيس
فاكر الدنيا لجنابه دايمة
ده في بُخله يا مغيث
و يسمى نفسه حريص
مسير كيسه للقراطيس
يفنوه في التهليس
لما يموت معدوم الذمة
مزادنا ع المكشوف
ده شايف وده مكفوف
أرقام في وسط حروف
وغابة في غفلة نايمة
ومعانا ضمير كمان
عايش في الأحزان
ماهو أصله من زمان
حموله عليه قايمة
المم وأكل عياله
وده ظرف طارق جاله
وجهاز بنته ومشاله
دي سحابة فرحة غايمة
و معانا ضمير كمان
هايج وسط تيران
حماه واحد جربان
مش لايقة عليه الفورمة
تهريب، وسرقة، غسيل أموال
بنوك، أراضي... أعضاء أطفال
ده غير النصب والاحتيال
بفلوسه ضارب الدنيا صارمة
مين يا ناس بيقول أنا شاري
مين وشه زي ضميره عاري
منه يخلص تاركوا وتاري
لو الضمير ترجعله لزمه
ضماير سودة كتير
اشكال على ألوان
ده قال أنا إنسان
و ده عارف أنه جبان
هنقفل المزاد
و برضو الخوف مالينا
و يارب العباد
الحقنا والطف بينا
من اللي شاري واللي باع
الاتنين ضمير وضاع
مع اللي واكل واللي جاع
خلاص خلصنا... فركش لمة