شوفتي آخرة دلعك لابنك!

أغلب الأمهات..
نظفي له أوضته، اعملي له سريره، وضبي له دولابه، اكوي له هدومه، شيلي له لبسه من على أرضية الحمام، ونشفي الحمام بعد ما يستحمى... لمعي له جزمته، وشيلي له طبقه من تحت بقه أول ما يخلص أكل. علميه الكرم بأنه يعزم صحابه على قفاكي كل يوم براحته. سيبيه يخرج كل يوم طالما عمل الواجب، لإن ده حقه. اعملي له فطاره وغداه وعشاه كل يوم لحد ما يتجوز، وخليه يفتخر بأنه ما بيعرفش يعمل حاجة في المطبخ لنفسه، ولا حتى كوباية شاي! عشان لما يتجوز يبقى راجل بيت ما حصلش! ويسيطر على مراته. وعشان يبقى ولاؤه ليكي طول عمره ويبقى حاسس بعظمتك، فيرد لك الجمايل دي كلها لما تكبري وتحتاجيه.
الحقيقة هي إنه لما يبقى شحط وما اتعودش إنه ينظف بيته ويأكل نفسه ويشيل طبقه وراه، عمره ما هيقدر يعمل ده. ووم ما تكبري وتتعبي وتبقي محتاجاه، مش هيقف جانبك كما ينبغي، لإنك بالنسبة له مكنة. الست بالنسبة له مكنة. انت زمان.. ومراته وبناته وحفيداته بعدين يبقوا يخدموا عليه.
انت كده بتخسري كل اللي كان بيتهيأ لك إنك بتبنيه. وهو عمره ما هيبقى سعيد، لأنه ما اتعودش على العطاء والمسئوليه من صغره، وبالتالي هو عمره ما هيقدر يسعد اللي نحوه. مش انت بس اللي خسرتي، هو كمان خسر. والمشكلة إنه مش ها يحس بالخسارة دي إلا لما ولاده يهملوه لما يكبر زي ما هملك. دلعك له افقده القدرة على العطاء. وانت أول واحدة هتدفع التمن غالي.