يوميات دكتور متعذب.. إنت بتعمل إيه!

جاتلي امبارح واحده كانت بتعمل حشو عصب في ضرسها...المهم الست ممله ملل السنين وكل حاجه بتسأل عليها وعامله فاهمه في كل حاجه
كل ما امسك حاجه ايه دي ؟! وبتعمل ايه ؟! وبتتكون من ايه
وياريت بتسكت مثلا...لا دي بتبتدي تُبدي رأيها في الموضوع..
ايه ده انت هتديني بنج عند الضرس الأخير واللي مسوس الضرس ده ؟!
اه يا ستي ماهو احنا بنخدر العصب والعصب لا مؤاخذه ورا عند الضرس الأخير
طب ماتدي عند الضرس نفسه عشان مفعوله يبقي قوي ؟!
يا ستي مينفعش... علميا وطبيا مينفعش !!!
يا دكتور بالمنطق كده البنج هيمشي مسافه اققصر لو اديت عند الضرس
ياستي ارحمي امي العيانه... ورحمه ضرسك ماينفع
طب على العموم برحتك.. انا قولت انبهك بس أن الضرس قدام مش ورا
وهكذا طول مانا شغال كل حاجه بتسأل وتدي رأيها في الكلام اللي بقولهولها
المهم ف جاي بحط الحشوه النهائيه
بتقولي دي نوعها ايه ؟! اسمها العلمي يعني
بقولها اسمها "كمبوزيت " حشوه بيضه.... زيك كده - في سري طبعا-
ايوه تركيبها ايه !!
قولت يادي النيله... بتتركب من نترات البوتاسيم مع بنزوات الكالسيوم
قولت اخلص من زنها واقولها أي حاجه عشان تسكت
لقيتها بتقولي طب والبوتاسيوم والكالسيوم مش ممكن يعملوا تفاعل مع بعض انا اعرف أن الاتنين مبيطحطوش مع بعض
انا قولت ايه ده !! شكلها قفشتني !!!
حضرتك خريجه كليه علوم ولا ايه ؟!
لا انا معايا اعداديه