كلمات المصريين بيقولوها وبالذات الأمهات ومتبقاش فاهم هم بيقولوها ليه أو إيه الغرض، زي مثلا: - ابقي تف على قبري لو فلحت.. طب ليه القرف، ليه أتف على قبرك يعني، ليه نقرف بعضنا وتبقي آخر ذكرياتنا مع بعض تفافة. - ما انتش نافع.. يعني المفروض الأمهات يقولوا كلمة تشجيعية، ربنا يوفقك، ربنا يكرمك، روح يبني إلهي يوقفلك ولاد الوسخة.. أي حاجة يعني - يارب تعدمني، إلهي يارب أموت يارب وترتاحوا مني.. طب إنتي لما تموتي إيه وجه الراحة في الموضوع.. يعني لو بنحبك فأكيد هنتعب من بعدك مش هنتمني موتك يعني عشان شوية قفش ولو مبنحبكيش هتتعبينا برضه فيعني إيه الكلمة اللي ملهاش معني دي وبعدين كلنا رايحينله محدش قاعد فيها. - ينفع يعني، ينفع ولاد خالك يبقوا أشطر منك وأحسن منك.. إنتي ليه بتقارنيني بولاد خالي، على فكرة إبن خالي دخل مدرسة زيي زيه، وبياخد مصروف زيي زيه وبيدرس في نفس الكتب العقيمة ومناخيره متبهدلة ولابس نضارة كعب كوباية، مش معني إنه بيجيب 5 درجات زيادة عني إنه عبقري عني، ليه ما تقارننيش بحد ليه إنجاز فأتشجع وأحس إني هبقي حاجة محترمة في الحياه.. مش هبقي زيي ابن خالي، وبعدين ليه أبقي زي حد أصلا أنا عايز أبقي نفسي. - غوور جك غورة.. طب إنتي كأم أو إنت كأب هيرضيك إن ابنك يجيله غورة وتقعد بقي تلف عليه في المستشفيات وتصرف عليه دكاترة نفسيين وقرف لحد ما الغورة تروح.. يرضيك يا حاج.. ها.. يرضيك؟.