اتجوزت اتنين في ربع ساعه

صحيت بدري وكان يوم مملوء بالعمل ووجع الدماغ وتعطل المترو وعانيت كثيرا من الزحام والارهاق ورجعت متاخر هلكان وقرفان وفتحت الباب جرت الخادمه كالعاده نحوي وهاتك حمدلله علي سلامتك ياسيدي.ستي في المطبخ عنك الشنطه ياسيدي..عنك الجاكيت اتفضل ارتاح.اقلع لك الشراب ..اجيب لك كبايه لموناده ياسيدي..حمامك جاهز ياسيدي..والنبي انت بتتعب قوي ياسيدي..يقطع الشغل واللي عملوه ياسيدي..لو ينفع اروح بدالك الشغل فداك روحي ياسيدي..قاطعتها بغيظ اخمدي يابت ابلعي ريقك وبطلي دوشه غوري هاتي الجرنال والقيت بنفسي علي الكرسي ومددت قدماي علي الكرسي المقابل لحين خروج الست المدام زوجتي عفاف من المطبخ او تنتهي من مكالمه تليفون طويله مع امها او صاحبتها او مشغوله امام التلفزيون بفيلم دراما قديم او مشغوله بتقليم اظافرها ووضع المانيكير المهم مشغوله عني وعن الترحاب بي واستقبالي وتركت كل شيء للخادمه واصبحت الخادمه اساسي في حياتي كوائل جمعه في دفاع الاهلي واصبحت اري واتحدث للخادمه اكثر مما اري واتحدث لزوجتي بحكم كثره طلباتي ووجودها امامي وانشغال الزوجه..ياجماعه انا راجل مهما كان وبحاول احافظ علي نفسي وعلي بيتي واحيانا تخرج الزوجه واكون لوحدي مع الخدامه التي تقترب اكثر فاكثر والشيطان شاطر وابن كلب يوسوس وانا احمد الضعيف وليس سيدنا يوسف عليه افضل السلام.قال لا لا بلاش الحرام...طيب جواز في السر في الخرصا او جواز عرفي وبعدين اللهم اخزيك ياشيطان..المهم قلت للخادمه خدي حسابك وكفايه كده واستغنينا عنها بالمعروف حفاظا علي بيتي وتحصنا لنفسي وخوفا علي بيتي وهاجمني مره اخري بوساوسه ايه ياعم مالك اتجوز تاني في الحلال وكمان تاخد ثواب تحل من مشكله العنوسه وثواب تسترواحده والبيت كبير والاصيله تنام علي الحصيره..ورنت كلمات ستي في وداني.يابني جوز الاثنين يا قادر.. يا فاجر قلت ياستي انا مش فاجر قالت لي ..بشر جوز الاتنين بالهم وكتر الدين...ياستي ماانتي اللي قلتي علي راي المثل جوز الاتنين عريس كل ليله.واحسست بوجود زوجتي امامي وكانها قرأت الصراع الداخلي وعرفت ماافكر فيه وصارحتها فقالت لأ طبعا ليه كده بعد العشره دي طلقني علي راي ستك عقربه في الغار ولا ضره في الدار..ياعفاف ياحبيبتي ولا عقربه ولا غار دي واحده زيك في الحلال يعني ترضي بيها وعلي عينك ياتاجر بدل ماتكون عشيقه من وراكي وبعدين انتي الاصل وانتي الكل في الكل وعلي راي ستي الاولي تحلي ولو كانت وحله ردت بضيق وقرف برضه لأ طلقني الضره مره ولو كانت جره..ياعفوف سيبك من امثال ستي دي هينوبك ثواب كبير تخيلي يوم القيامه تقولي يارب صبرت علي جوزي واستحملت وسترت واحده عدت سن الجواز ياعالم كان ايه هيحصل لها ووافقت علي جوازه منها وبلعت طمعانه في مغفرتك وجنتك يارب...وبعدين هتساعدك وتشيل شغل البيت عنك. ماتفكيها بقي ياابله عفاف وتوافقي وانا باذن الله هحاول اعدل بينكم قولي آه ياعفاف وريحيني بقي ردت بحسره علي راي ستك..الضره ماتحب الضره ولو خرجت من صرتها.ستي وستك ماتوا الله يرحمهم.. انتي دلوقتي ست الكل.. وعشت مع زوجتي الاولي عفاف وزوجتي الثانيه ايام سعيده وهنيه كنا نضحك معا ونخرج معا ياااه مااحلاها حياه سعيده بين زوجتين متفاهمتين وزوج يحاول ان يعدل بينهما وتعودت ان انام مبكرا وتعودت ان اعود مبكرا وتعودت الترحاب عند الباب باللموناده والحمام والطعام..علي راي ستي ابنك علي ماتربيه وجوزك علي ماتعوديه.وسمعت وفزعت علي صوتا جهوريا قادما من المطبخ سيدك جيه يابت...ايوه ياستي ونايم علي الكرسي من ربع ساعه..صحيه الاكل خلص...وصحيت وياريتني ماصحيت..والله يرحمك ياستي
مش تخاريف صيام ده جس نبض