النصب التطور الطبيعي للتسول.. "البوابة نيوز" ترصد أحدث ابتكارات المتسولين في الشارع المصري.. باشا فخيم أو بنت صاروخ أو حد عاوز فكه.. خبراء الحلول التقليدية ليست حلًا لمواجهة الظاهرة

- سامية خضر: إلقاء النصابين والمتسولين في السجون يزيدهم انحرافًا
- محمد عبد الفتاح: مجتمعاتنا تهتم بالوجبات ولا تهتم بالأخلاق
- رشاد لطفى: الحلول لابد أن تبتعد عن المسكنات
النصب شطارة والرزق يحب الخفية والذكي هو اللي يعرف يطلع القرش من بطن الحوت "مذهب قديم جديد للنصابين، وكلما كان النصاب على قدر من الذكاء كلما كان متجددًا وصيادًا ماهرا، وبما أن التسول نوع من النصب فقد أصبح له "نيولوك" وليس على شكله القديم لذاك الرجل الكفيف ممزق الثياب كثيف الشعر المسن كثير التجاعيد، فعلى ما يبدو أن هذه الصورة أصبحت أولد فاشون ولم تعد تجذب قلوب أصحاب الجيوب الكفرانة ولهذا ظهرت حيل جديدة وألاعيب تعرض لها الكثير منا ربما أصابته بالغضب وربما أدخلته في كريزة ضحك هيستيري من نفسه وعلى نفسه "البوابة نيوز" تكشف أهم مظاهر وأشكال النيو لوك في التسول والنصب وما رأي المتخصصين في هذه الظاهرة.
تتبع معنا هذا التحقيق
مدام سارة تتحدث عن هذه الظاهرة وتقول: النصب دا بقا موهبة والممثل المحترف هتلاقيه نصاب محترف ومش شرط أنه ينصب عليكى في الشراء والبيع لا الموضوع بقا مختلف والمهارة إنك تلاقي نفسك منصوب عليك بمزاج لكن الغريب أنى بقيت كل يوم أشوف بنات وستات بيعزفوا على لحن واحد: (معلش أصلي جاية من سفر واتسرقت ومحتاجة أجرة السرفيس ممكن تساعدينى) معرفش دا نظام جديد للنصب ولا إيه؟
نصابة واشتغلت نصاب
ويحكى محمود الذي انفجر بالضحك قائلا أنا شغال تايم شير في شركة تبيع الهوا للناس ومهمتي النصب ع الزبون بالكلام في الشارع لحد ما أقنعه ويطلع الشركة، وأنا واقف في الشارع جاتلي بنت صاروخ شكلها بنت ناس جدا وحاطة برفان فظيع قالتلى هو أنا ممكن أطلب منك خدمة، طلبت مني اشتريلها كارت اتصال لأن فلوسها اتسرقت ورصيدها خلصان ومش عارفة تتصرف طبعا اتكسفت واديتها 20 جنيها وقولتلها اشتري أنت رغم أنني كنت هموت وأوصلها، وفي آخر اليوم وأنا مروح أنا وزميلي لقيته بيقولي أسكت جاتلي بنت النهارده صاروخ بتعيط قولتله أسكت متكملش وانفجرت من الضحك.
الباشا الفخيم طلع نصاب
بينما أحمد سواق التاكسي له موقف مختلف مع النصب ويقول: ركب معايا واحد باشا وشكله فخيم من الرحاب وقالى وصلنى المهندسين أجيب حاجة من المكتب ورجعنى تاني وعزم عليا بسجارة مستوردة المهم وصلت صاحبنا للمكان وفضلت استناه ساعة ومجاش فنزلت ودخلت أسأل وإذا بالعمارة ليها 2 باب ودخل ابن النصابة من باب وطلع من الباب التاني ونصب عليا.
التسول بالغنا نصب غربي شرقي جديد
مدام رحاب قالت: التسول مبقاش بالعياط وأكياس الدم والمناظر الصعبة، النصابين والمتسولين تقريبا عرفوا إننا جيبنا جاز من أحوال البلد البايظة وبقوا يبتكروا ويقلدوا الغرب وبقيت ألاقى مطربين متسولين، وشوفت واحدة عرباوية طالعة تقول مواويل في المترو بتغني لينا وتنصب علينا وتاخد اللى فيه النصيب.
"أبين زين واقرأ الكف واضرب الودع " نصب ممنوع مرغوب
سارة حسين موظفة في إحدى المؤسسات الحكومية، ترى أن الدجل نوع من النصب بس نصب دمه خفيف مقبول لحد ما والمضحك فيه أن كل الأخبار الغيبية جميلة وأن سكتى سالكة وابن الحلال جاي ورزقي كتير والحياة وردي ورغم أننا بنكون عارفين أن الكلام دا نصب وكدب بس بنسمعه ونتونس بيه بدل ما ننفجر من كتر الهم.
احذروا سؤال...(حد عايز فكه)؟
ويحذر الحاج مصطفى من هذه المقولة ساردا قصته مع النصب حين كان في طريقه للبيت راكبا الميكروباص ويقول: لما ركبت حد جه جنب الشباك ونده "حد عايز فكه" ورد السواق قال اللى مش معاه فكه يفك يا جماعة عشان انا باستفتح فقلت أفك وطلعت الخمسين جنيها من الشباك قالى هلفلك ياحاج من الناحية التانية وأخد الفلوس وجرى طيران.
وتابع مصطفى: طول ما فيه فقر طول ما النصب والسرقة والتسول هيزيدوا ولازم نفهم كدا لأن محدش هيبات من غير عشا هو وعياله، فلازم الحكومة تشوف حل للناس دي.