ارحموا الهواتف المحمولة

تبقى قاعد لابيك ولا عليك وتلاقى فجأة موبايلك يرن (نغمة الرسايل) وتفتح الرسالة تلاقى (اشحن اكتر وزود فرصك إنك تكسب مليون جنيه وجوايز كتير) أيوه نظام جر رجل دا انا عارفه كويس، وأشحن من هنا وأعمل مكالمة من هناك والاقى رصيدى اتسحب وخلاص، في إيه معرفش واقول طب والله ماانا شاحن تانى !
ورسالة تانى تقولك ( تمتع بخدمة كأس العالم ومواعيد ونتائج المباريات أرسل رسالة للرقم كذا ! أو رسالة تانية تقولك استمتع بأحلى النكت أو اعرف حظك اليوم أو اسمع الاغنية للمطرب فلان أو احصل على نغمة اغنية (بشرة خير) أو تابع حالة الجو!
سؤال: هو مين اللى هايكلف نفسه ويبعت رسايل بفلوس علشان يعرف أخبار برجه أو يسمع أغنية لفلان ؟ ! هو النت موصلش للناس دى ! ليه أكلف نفسى لما ممكن اخد اللى عايزه وببلاش !
هو مش كفاية علينا رسايل (مبروك اخترنا رقمك ليدخل السحب وتفوز بعربية)، ولا اشحن وزود فرصك في الفور.. وسلفنى شكرا واشحنلى شكرًا. ومن اخطر الرسايل ( بليز كول مى) والرسالة دى لوحدها توقفلك قلبك بعيدًا عن الرسايل التانية اللى بتحرق دمك (ارحموا الهواتف المحمولة إنها تستغيث)!