‏...‏ وهي دي الدنيا

رنة موبايلك عندي غير الخلق سكرها لما ترن يملا الحلق من غير ما اخصصلك نغم باعرفها زي المدد يا حبيبتي ساعة الطلق وهي دي الدنيا‏...‏ .......................
الوردة جنب الوردة في البستان
م الفل روح والتانية م الريحان
وما فيش ما بينهم شوك قلق أو غيرة
إلا ان دخل قصتهم الإنسان
وهي دي الدنيا...
.......................
نص البلد بقي تحت خط الفقر
فيه ناس يا دوب بيعيشوا يوم في الشهر
لكن كمان كل المدارس صابحة
بتقول بصوتها العالي تحيا مصر
وهي دي الدنيا...
.......................
ثرت وما يمنعش اني اثور تاني
تستاهلي فرحي وبرضه أحزاني
آخر ما فيها ح اشوف معاكي نهار
أو ليل ح اقضي سنينه وحداني
وهي دي الدنيا...
.......................
وحده الشهيد في القبر حنوا له
وما تقلقوش لو قام فرد طوله
عايز يفضفض للوطن يا ولاد
خلوه يقول وابكوه وباركوا له
وهي دي الدنيا...
.......................
برد السنة دي غير جميع البرد
دبل قلوب مش بس دبل ورد
قال الولد للبنت حضنك دافي
بس البيبان قدامي انا بتترد
وهي دي الدنيا...
.......................
واقف علي بابك يا حلوة سنين
الشوق ماليني... وجنبي ناس فارغين
عاوزك تشوفي الفرق بيني وبينهم
بين اللي عاشق واللي مش عاشقين
وهي دي الدنيا...