من غير نيش.. جوازه مافيش

هو الشاب مننا إيه غير شقة إيجار قديم وشغلانة ثابتة وجمعية هيقبضها قريب، سيبك من الشهادات والثقافة والكلام اللى مايشتريش تلاجة ده، أي شاب بيتقدم لواحدة طبعا لازم يكون معاه شقة، تمليك بقى إيجار قديم مش مهم، في الزمالك أو في الخصوص مايضرش، المهم يكون معاه شقة ودي في حد ذاتها إنجاز كبيييير يحسد عليه ويكون دافع قوى للتقدم لبنت الحلال.. طبعا أي شاب بيتقدم لازم وفرض عليه إن الحلويات تكون من العبد وإلا الموضوع يفشل لاقدر الله، ودي عادات وتقاليد لايجوز تغييرها، وكمان يكون معاه أمه وأخته ويكونوا مبتسمين كدة وفرحانين وإلا أهل العروسة ياخدوا انطباع لاسمح الله إنهم بيكرهوا البنت. ولازم الشاب يكون مرن في المفاوضات بين الأهل، يعنى لو فيه خلاف على شيء يتحمله الشاب ماجتش على التليفزيون يعنى مش مشكلة حتى لو شاشة led 48 بوصة هما موافقين مش هيقولوا حاجة !! وكمان مايقولش مش هاعمل فرح وخليها على الضيق دى تبقى مصيبة..إحنا عايزين نفرح بالبنت هو إحنا في عزاااء وبعدين دى البكر، والأثاث ماتنساش من دمياط علشان يقعد فترة طويلة، اه اللى أوله شرط، والتكييف بقى ضروري دلوقتي إنت عارف إن المروحة مش كفاية في الجو الحر ده.. طيب تمام كله عال والكل إتفق نقرأ الفاتحة بقى.
ثوانى ثوانى طب والنيش، إياك تنسي النيش، ده أهم من البوتجاز، ده شرط أم العروسة، إوعى تقول مالوش لازمة هترد عليك حماتك وتقولك مالهاش لأزمة الجوازه، هتقول فايدته إيه ؟؟ هتقولك أمال الصينى اللى إحنا دافعين فيه دم قلبنا هنشيله فين، أرجوك ماتعترضش وتقول الكاسات والأطباق وطقم الفنجان بيتحنطوا فيه وإنه بيشغل مساحة ع الفاضى، أنصحك بلاش تقول كدة لأنك هتلاقى الرد جاهز وعفوى من غير نيش..... جوازة مافيش !!