كمال أبو رية: الأدوار التاريخية هي اللي بتناديلي

قال الفنان كمال أبو رية إن الأدوار التاريخية هى اللى بتحبنى بمعنى انا اللى بتطلب ليها وانا بستمتع بادائها مفيش عمل انا اللى اخترته هما بيشوفوا إن أنا مناسب للشخصية فبيختارونى، وورا الكاميرا انا مش دمى خفيف بس لا أنا فوضوي وكسلان وحاجات كتير.
جاء ذلك خلال مداخلة هاتفية لبرنامج اللمة تحلى على شعبى اف ام الحلقة من تقديم شيماء السباعي.
وأضاف ابو رية عملت حاجات كوميدى زى عفاريت عدلى علام اتصنف لايت كوميدى، مأمون وشركاه كوميديا موقف وفيه حاجات تانية كتير وممكن اكمل كوميدى بس للاسف الكتابة الكوميديا صعبة اصعب من الكتابة التقليدية.
وتابع الكوميديا الراقية هى الشخصية اللى تعمل افعال جادة ينتج عنها ضحك هى ديه الكوميديا الحقيقية اللى اتعلمناها فى المعهد زى اللى بيعملها عادل امام ديه كوميديا حقيقية.
وعن الفنان أحمد عبد العزيز قال أبو رية: أنا وأحمد عبد العزيز لينا ذكريات كتير مع بعض فى سوق العصر كان بيفرهدنى احمد بيشتغل بجد اوى بيروح الاستوديو بيبقى واحد تانى خالص، وجالنا اعلان كنا هنعمل فيه مشهد من سوق العصر ومكنش عندنا مانع نعمل الاعلان طالما مش هيهدر من قيمة المشهد الحقيقى وميبقاش تريقة عليه او هزار او يقلل من قيمته يستأذنه شركة الانتاج و اننا ناخد فلوس كتير ديه كانت الشروط بتاعتنا لكن متوفقناش وبصراحة مكناش متحمسين اووى.
وعلق ان الحب سر السعادة وان الواحد يحب اللى حواليه والناس اللى حواليه تحبه، ولو هتجوز شخصية تاريخية اتجوز نفرتيتى كانت شخصية مهمة جدا.
واختتم قائلا مفيش حاجة مش حابب اعملها لان الحاجة اللى مكنتش موفق فيها اوى كان ليا عذرى انا اشتغلت حوالى 100 مسلسل وراضى عنها والحمد لله، وشعبي اف ام محطة جميلة بسمعها كتير لانها اذاعة مصرية بتعبر عن نبض الشارع المصرى بشكل صادق وحقيقى وكل سنة وانتوا طيبين.