كمال أبو رية: الأدوار التاريخية هي اللي تناديني وأنا كوميدي جدا برة الكاميرا

قال الفنان كمال ابو راية: "الأدوار التاريخية هي اللي بتحبنى بمعنى أنا اللى بطلب ليها وأنا بستمتع بأدائها مفيش عمل أنا اللى اخترته هما بيشوفوا ان انا مناسب للشخصية فبيختارونى، وورا الكاميرا انا مش دمى خفيف بس لا انا فوضوى وكسلان وحاجات كتير، جاء ذلك خلال مداخلة هاتفية لبرنامج "اللمة تحلى" على أحد محطات الإذاعة.
وأضاف: "عملت حاجات كوميدى زى عفاريت عدلى علام اتصنف لايت كوميدى، مأمون وشركاه كوميديا موقف وفيه حاجات تانية كتير وممكن اكمل كوميدى بس للاسف الكتابة الكوميديا صعبة اصعب من الكتابة التقليدية".
وتابع: "الكوميديا الراقية هي الشخصية اللى تعمل افعال جادة ينتج عنها ضحك هى دي الكوميديا الحقيقية اللى اتعلمناها فى المعهد زي اللى بيعملها عادل امام دي كوميديا حقيقية".
وعن الفنان أحمد عبد العزيز فقال: "أنا وأحمد عبد العزيز لينا ذكريات كتير مع بعض فى سوق العصر كان بيفرهدنى احمد بيشتغل بجد أوى بيروح الاستوديو بيبقى واحد تانى خالص، وجالنا إعلان كنا هنعمل فيه مشهد من سوق العصر ومكنش عندنا مانع نعمل الإعلان طالما مش هيهدر من قيمة المشهد الحقيقى و ميبقاش تريقة عليه او هزار او يقلل من قيمته ويستأذنه شركة الانتاج واننا ناخد فلوس كتير ديه كانت الشروط بتاعتنا لكن متوفقناش وبصراحة مكناش متحمسين اووى".
وعلق: "الحب سر السعادة ان الواحد يحب اللى حواليه والناس اللى حواليه تحبه، ولو هتجوز شخصية تاريخية اتجوز نفرتيتى كانت شخصية مهمة جدا".
واختتم قائلا: "مفيش حاجة مش حابب اعملها لان الحاجة اللى مكنتش موفق فيها اوى كان ليا عذرى انا اشتغلت حوالى 100 مسلسل فلو منهم 3% راضى عنها فالحمد لله".
اقرا ايضا
أول رد من «مربوحة» على دنيا سميرغانم بعد إعجابها بدورها في الكبير أوي 6