"الناس في مصر مظلومة".. رسائل السيسي خلال إطلاق مشروع تنمية الأسرة (فيديو)

ألقى الرئيس عبدالفتاح السيسي، كلمة خلال إطلاق المشروع القومي لتنمية الأسر المصرية بالعاصمة الإدارية الجديدة.
وقال الرئيس: "أنا عايش معاكم الحكاية وفى 2014 قولت الكلام ده، وفي سبع سنين زدنا 14 مليون نسمة، هل جالي أرقام دخل تكفى هذا النمو ال14 مليونا، طبعا لا ده عجز من الدولة، لا قدرة الدولة مش متمشية مع قدرة نمو الدولة والاثنين مش زي بعض".
وأضاف: "لو عندى مصروف ألف جنيه، ودخلي مش ألف جنيه يبقى فيه عجز، وأنا مش بتكلم في موازنة عجز القدرة والأداء"، موضحا أن من غشنا فليس منا وهذا ردا على من يغش شهادة ما قبل الزواج "بيظلم نفسه وولاده".
وتابع أنه تحدث مع أحد المسئولين في بلجيكا عن الناتج المحلي، قائلا: "قولتله عاوز جامعة تدي تعليم كويس.. وعاوز مدرسة تعمل تعليم كويس.. ومش الناس تتخانق علشان تغشش ولادها.. علشان تقولى إن ابنى معاه شهادة شغله بقى".
وكشف الرئيس عبدالفتاح السيسي، عن الحوار الذى دار بينه والمسئولين فى بلجيكا قائلا: "التقيت بالناس وأول ملف كنت بتكلم فيه عن ملف حقوق الإنسان لأننا معندناش حاجة مخبينها وعندنا قضية مش معروفة وغير معلومة إلا للبعض، من ضمن الحاجات اللى كنت بتكلم فيها مع المسئول قلتله ليه مسألتنيش عن الناتج المحلى بتاعك كام؟.. استغرب يعني وقلتله الناتج المحلى عندك كام قالى 500 مليار والسكان قال 10 ملايين نسمة.
وأضاف الرئيس: "أخبرته يبقى أنا عاوز دخلى 5 تريليونات دولار علشان عندي 100 مليون نسمة، وعلشان أنا معنديش المبلغ ده الناس في مصر مش بتاكل كويس ومبتتعلمش كويس ومبتتعالجش كويس، أدى حقوق الإنسان اللى انا أعرفها".
وكشف الرئيس عبدالفتاح السيسي، عن الوظائف الجديدة التي تسعى الدولة إلى العمل عليها قائلا: " أنا عاوز اقولكم على حاجة احنا بنتكلم من كام شهر علشان عايزين مستوى متقدم أوى في النظم وعلشان بس بقولكم بيتخرج من عندنا 700 ألف طالب جامعي انا كلامى كاشف ولا مؤلم".
وأضاف: "هقولكم حاجة قولت الكلام ده من 3 سنين من أيام الدكتور ياسر وزير الاتصالات السابق وبنكلمه حاليا بنبى فرصة عمل مبنية على النظم.. وبقول للمصريين ولادكم ومستقبلهم، وكل الكلام والإصرار والقتال والعمل من أجلك يا مصر قسما بالله قسما بالله".
وتابع الرئيس السيسي: "سوق العمل اللى بتكلم عليه فيه دولة في مستوي العالم عاوزه مليون وظيفة فيه مليون وظيفة انا عندى شباب كبير.. 30 ألف دولار للدارس انا جاهز من أجل دعم هذه الوظائف".
وأضاف الرئيس خلال كلمته في تدشين مشروع تنمية الاسرة المصرية: "الناس في مصر مظلومة ومبتتعلمش كويس ومبتتعالجش كويس.. أنا مش مانع حد يتكلم أنا عاوزه يتكلم.. بس يعرف قضية البلد كويس قبل ما يتكلم ويسمع الناس وينكد عليها في بيوتها بدون كلام أقل ما فيه مش مستكمل معرفته، ودي كلمة مؤدبة عن الجهل وعدم إدراك وعدم تقدير الواقع اللى احنا فيه".
وقال الرئيس عبدالفتاح السيسي، إنه لولا فضل الله على مصر لكانت ذهبت مع الدول التى تهدمت، متابعا: "كلامي كاشف ولا مؤلم، والناس عاوزة تعيش برضا بس مش عارفين وبيشتكوا من الغلاء".
وأضاف الرئيس السيسي: "بدل ما تجيب فيلم الإرهاب والكباب وتجيب المواطن بيشتكى، خلى البلد خصم مخلاش السلبية خصم؛ أنت المفروض تخلي السلبية خصم".
وأوضح الرئيس: "المواطن اللى مبيشتغلش هو اللى خصم، لما حولت البلد لخصم هدوها ولولا فضل الله علينا وكرمه لكانت البلد دى زى باقى البلاد اللى انتوا شايفينها ما قامتش تاني ولا رجعت تاني خلاص واللى يروح يروح ميرجعش لكن الله أفاض علينا، طيب بعد أن أفاض علينا هنفضل زى ما احنا كده، أقابل ناس في الشارع تقولى انا زعلانة منك اقولها ليه تقولى عندي 6 عيال أقولها أعمل إيه بس هما ساعات ميجبوش الحاجات دي في التليفزيون علشان ميزعلوش، يعني أقولها انتي عندك 6 أقولها أنا عندي 100 مليون".
واستطرد الرئيس عبدالفتاح السيسي: "البلد دى بلدنا كلنا مش بتاعتى أنا بس، وأنا دائما أقول الأمن القومي والأمن القومي والأمن القومي في كل حاجة.. الرعاية الصحية أمن قومي.. التعليم أمن القومي.. والدكتور طارق شوقى وزير التعليم خد على دماغه لحد لما مات لما جيه يطور التعليم".
وأضاف الرئيس: "أنتم عاوزين تعليم ولا مش عاوزين.. لقاءاتنا دي توعية حقيقية لواقعنا.. واحنا مش بنتكسف.. انتوا قولتوا كلام مرتب هيفهموا ناس كتير.. وفيه ناس كتير تانيين ممكن مش يفهموا الكلام زى معدل النمو وغيره".
ورد الرئيس عبد الفتاح السيسي، على مزاعم الدول التي تدعى عدم حصول المواطنين على حقوقهم في مصر قائلا: "الدول اللى بتقول مبتدوش حقوق للناس.. حقوق إيه أنا مش لاقي أكل.. مش لاقي أشغل ..مش عارف أسكن.. وقالك روحوا المرج والمطرية والخصوص، لما بمشى في الشوارع الاقى إيه هي دي بلادنا اللى في رقابتنا.. يا كل المسئولين والإعلام والصحة والتعليم والجامع والكنيسة انزلوا شوفوا البلد عاملة إزاى".
وأضاف الرئيس: "علشان افتح شارع بشيل بالألف بيت وعمارة علشان الناس تمشى فى حتت ما مبيتمشيش فيها أنت جاى تعمل إيه .. إيه حكايتك النهارده.. لا والله انا بقولكوا علشان البلد دي بلدنا".