"أمهات مصر" يكشف عن أهم المراحل التعليمية والعمرية لمتابعة الأبناء

طرح اتحاد أمهات مصر للنهوض بالتعليم، برئاسة عبير أحمد، سؤال على أولياء الأمور من الأمهات حول هل يتم متابعة أبنائهم في المذاكرة والدراسة أم لا؟ وما هو السن والمرحلة العمرية التي تستحق المتابعة؟.
وتفاعل المئات من أولياء الأمور من الأمهات على صفحة اتحاد أمهات مصر، في فيس بوك، حيث قالت ولي أمر: "لغاية ما يخلص الإعدادية بعد كده اسيبه من أولى ثانوى يعتمد على نفسه وأتابعه فقط لو احتاجنى لازم أكون جنبه، المناهج بتتطور ولازم كلنا نساعد ولادنا مفيش أى حاجه لوحدها، الفكرة مش أنى اسيبه الفكره أنى أكون مطمنة عليه ومتأكدة أنه خلاص فاهم مصلحته وهيمشى أموره صح، المرحلة دى وكل المراحل تحتاج متابعة ومراقبة وتواجد باستمرار لغاية ما يعدوا بر الأمان".
وأضافت ولي أمر: "طبعا بنتابع وهنستمر على المتابعة، مفيش سن بالنسبه لى هقف عنده لأنى شايفة إن عدم المتابعة هيسبب الإهمال"، وتابعت أخري: "حسب الطالب اللي قدامك، في حد بيحتاج تنقليه خطوة خطوة وفي حد تاني تأسيسه وتسيبيه وفي حد بيحتاج رؤوس أقلام مش أكثر".
واستكملت أخري: "البنات واحدة واحدة بيحبوا يعتمدوا على نفسهم مع متابعة بسيطه اسمعلها حاجه واقفه أمامها واشرحلها لكن الصبيان حنفضل متابعين لغاية مالا نهاية"، وذكرت ولي أمر: "المفروض إن من أولي ثانوي خلاص يعتمدوا على نفسهم، بس المشكلة دلوقتي الدراسة الأون لاين محتاجة متابعة علشان ممكن الوقت كله يضيع مع السوشيال ميديا للأسف".
"أنا بفضل أتابع لحد تالته إعدادى شرح ومذكرة، بذاكر معهم كلمه بكلمه، أما ثانوى متابعه من بعيد من غير ما أدخل في منهاهجهم"، تضيف ولي أمر أخري: "بتختلف من أم لأم على حسب ظروفها لكن الإهتمام أكبر بيبقى للطفل الأول وبعد كده بيقل، لكن أنا شايفة إن مرحلة ابتدائى مهمة للتأسيس بعد كده متابعة بسيطة لأن الأم بيكون عليها عبء كبير".
وأشارت ولي أمر أخري إلى: "أنا حاليا ابني في أولي إعدادى ومش عاوز يذاكر لوحده وحاولت كتير مفيش فايدة لو سبته لوحدة مايعملش حاجة خالص"، وقالت أخري: "لحد تالته إعدادي بتابع، أما من أول أولى ثانوي مع نفسه علشان يبدأ يعتمد ويشيل المسئولية لكن بتابعه من بعيد"، وتابعت أخري: "أنا بذاكر معاهم بصراحة ومش بناخد دروس، أنا إللى قايمة بالدور كله لوحدى بالرغم من أنى امرأة عاملة، ربنا يعينى ويعينكم جميعا".