رسائل حاسمة من السيسي لمخالفي البناء

أكد الرئيس عبدالفتاح السيسي، أن وقف إصدار تراخيص البناء الفترة الحالية أمن قومي ومصلحة وطنية.
وأضاف: "قررنا عدم إصدار تراخيص بناء في بعض المناطق بمحافظة القاهرة، ولكن هل عملنا ده كرها في الناس ولا تضييق عليهم ولا علشان مبنحبش مصلحتهم، لأ إحنا عملنا كده علشان لا بد من مراجعة الكثافة الموجودة فيها علشان الناس تقدر تعيش بشكل مناسب كحد أدنى، وبالتالى فيه أماكن في القاهرة لن يصدر لها ترخيص مرة أخرى، واشتراطات المبانى كانت بتقول 7 أدوار هيبقى دورين بس".
وشدد السيسي، على أن الدولة لن تتهاون مرة أخرى مع البناء غير المخطط أو المخالف.
وأضاف: "خلونا نتوقف عن البناء غير المخطط ونبدأ ننظم بلدنا.. وكل اللى عاوز شقق ياخد شقق، والناس اللى عاوزه تاخد وتبيع للناس، بصراحة هنكون حازمين واشتراطات البناء ستكون في منتهى الحزم والقسوة، ومش هنقدر نستحمل كده، واستحملنا العشر سنوات".
وتابع الرئيس: "عايز أقولكم على حاجة.. عاوزين نوصل الطريق بتاع الوفاء والأمل حتى طريق السويس.. وكل الطرق اللى بنتكلم عليها طبقا لخطة الدولة القومية.. ودى حاجة معمولة في مصر من 20 و30 سنة فاتوا.. عايزين ألفين وحدة لتنفيذ طريق مساحته 2 كيلو.. وهيبقى صلابة وشدة من الأجهزة من التنمية المحلية.. هدفنا حماية وطن من أننا نعيش كده.. ونسينا الصح والحياة الحقيقية للبشر".
وأضاف: "هيبقى عافية وجبر، لا الموضوع مش كده، ولكن لازم نحل المسألة عن طريق اللى إحنا وصلناله كفاية عليه، والقرار ده اتأخر 20 سنة".
ووجه الرئيس السيسي، الشكر للبنوك وصندوق تحيا مصر لمساهمتهم في مشروعات الإسكان، وكذلك وزارة الإسكان وهيئة المجتمعات العمرانية، وتحملها العبء الأكبر للخروج بالمشهد المشرف.
وقال: "فيه مناطق إسكان اسمها زلزال واحد، وزلزال 2 وزلزال 3.. أوضتين وأوضة وصالة.. ونريد فتح الباب لهم للتقدم على شقق بمبالغ معقولة، بحيث أعرف أقول لوزير الدفاع زى ما أعطيتنا الأرض دى، عاوزين حتة أرض تانى من معسكرات الجيش لأجل ال 22 ألف وحدة.. لو عاوزين يغيروا لسكن أفضل ممكن نعملهم نظم تمويل، ولو قدرنا نعمل إحلال لمنشآتهم هيكون أفضل".
وتابع: "أى إنسان يحتاج شقة إحنا نوعده بفضل الله سبحانه وتعالى بتوفيرها، ومش بنخلف وعودنا وهنوفرله الشقة".
ويفتتح الرئيس عبدالفتاح السيسي، اليوم الأحد، عددا من المشروعات القومية من بينها المرحلة الثالثة من سلسلة إسكان الأسمرات وهي "الأسمرات 3" والتي تضم آلاف الوحدات السكنية الكاملة الخدمات والمرافق، بالإضافة إلى افتتاح أكبر مجمع للخدمات يستطيع أن يلبي مطالب نحو 100 ألف نسمة يقطنون مشروع الأسمرات بمراحله الثلاث.
يهدف المشروع إلى نقل وتسكين الأسر والأهالى من قاطنى العشوائيات والمناطق الخطرة داخل مجمع سكنى حديث يوفر لهم واقع مجتمعى جديد به جميع الخدمات السكنية والمجتمعية على نحو متكامل.