«كباكة» يزين بريشته شوارع الوراق

أحمد مجدى أحمد المعروف ب«كباكة» عن فنه، شاب ثلاثينى، من محافظة الجيزة، بدأت موهبته منذ صغره وعمره كان 8 سنوات، ويقول: «والدى شجعنى من صغرى، وبدأت أمسك القلم وأرسم من وأنا عمرى 8 سنين، بعد وفاة جدى من كتر حزنى عليه مسكت القلم ورسمت صورته وطلعت نفس الصورة، لأنى كنت متعلق بيه أوى، ودخلت وقتها مسابقات كتير وكنت بفوز بيها.
ويتابع: «فكرة الرسم كانت بتزقزق في مخى دايمًا، وإن أنا ابتديت من صغرى كان ممكن ميبقاش عندى أى موهبة وتكون في خبر كان». وأضاف أنه بدأ يطور من ذاته فعليًا، ويلفت إلى أنه تعمق مواهبته ويرسم ثرى دى.
وقال: الفكرة مش مجرد رسم، بحاول أوصل رسالة من خلال شغلى على قد ما بقدر، والرسم مش مجرد ألوان على حيطة وخلاص، وبحاول دايما أدى لكل جدار حقه في الشغل وإن ممكن يبقى عليه حاجة أحلى وأجمل كشكل من الإعلانات.
وعن طريقة عمله يقول، بروح المكان أبدأ بأخذ صور للجدارن اللى هتترسم، وبعدها أبدأ باختيار الصور التى تكون عامل جذب الناس للمكان كى يلتقطوا الصور بجانبها، ومن خلال برنامج الفوتوشوب أقوم بتركيب التصميم على الجدار اللى صورته وبعد كده أشوفه مناسب من حيث الألوان والشكل، وبعد الاستقرار على الشكل النهائى أعود لأصحاب المكان وأشرح لهم وجود التصميمات في أماكن معينة وأهميتها للتصوير مثلا، أو الألوان، فيه أماكن، الديكورات اللى فيها بتحتاج ألوان هادية، وأماكن العكس يعنى الكافتيريات بيبقى عليها شباب كتير وأعمار مختلفة يفضلون أشياء مختلفة تلفت نظرهم عكس مثلا لو مطعم عالى شوية بيحتاج تصميمات مش لافتة بس يكون شكلها مناسبا للمكان وللناس اللى موجودين وكل مكان حسب ظروفه.