10 نصائح لزائري سور الأزبكية بمعرض الكتاب

عشرة نصائح هامة وجهها الكاتب سامح فايز لجمهور معرض الكتاب الذي يرغب في ارتياد سور الأزبكية، وذلك نظرا لارتفاع أسعار الكتب هذا العام.
وقال فايز على حسابه الشخصي في موقع "فيس بوك": نظرا لارتفاع أسعار الكتب هذا العام بسبب ارتفاع سعر الدولار وإن الكتب بقت أغلى من كيلو اللحمة أصبح سور الأزبكية ملتقى كل أطياف الشعب ورمز الوحدة الوطنية والتكافل الاجتماعى، يعنى ساكن التجمع الخامس جنب بجنب قدام ساكن ترب الغفير، من هنا قررت أن ألقى بخبرتى اللوذعية في هذا الأمر حتى أساعد على زيادة الوحدة الوطنية والألفة بين قوى الشعب، وما أكتبه الآن هو خبرة 12 سنة متابعة لسور الأزبكية ومكتبات الكتب القديمة في القاهرة، ضعوها في الاعتبار.
1- اوعى تطلب كتاب بالاسم من البائع، هيعرف إنك محتاجه وهتلبس في الحيط يا معلم.
2- لو لقيت عنوان يهمك وهتموت وتشتريه اسأل عن أسعار الكتب اللى في نفس الركن واوعى تحسسه إنك قاصد كتاب بعينه.
3- لو صاحب المكتبة قالك كل كتاب بسعر لف وارجع تانى واعلم أنك وقعت في عباءة حوت هيخليك تبيع هدومك.
4-في السور بتلاقى كتب للعرض وكتب داخل المكتبة، العب دايما على العرض لأنهم بيجيبوا رجلك بعناوين تشد، إنما لو دخلت جوة المكتبة هتخرج بلبوص.
5-اعمل نفسك شحات واوعى تعمل فيها ابن ناس وبابى ومامى، هيستغل الفرصة والكتاب أبو جنيه هيبيعهولك بالدولار.
6- ما تشتريش من أول مكتبة تقابلك، وخليك متأكد إن تاجر واحد اللى بيبع لكل المكتبات، يعنى الكتاب أبو عشرة جنيه هنا ممكن تلاقيه بجنيه في مكان تانى.
7- لو عاوز تشترى رواية اشتريها من مكتبة متخصصة في الكتب الدينية. الرويات عندهم من باب العلم الذي لا ينفع وبيبقوا عاوزين يتخلصوا منها عشان البركة تحل على المكان.
8- أما بقى لو لسه سامعلك محاضرة لعمرو خالد وعاوز تتوب يبقى تشترى الكتب الدينية من عند واحد كل كتبه قصص وروايات، الناس دى بتبقى في الغالب معفنين وبياكلوا حبنة نستو وممكن يدوك الكتب الدينية وعليها رواية هدية.
9- لو لقيت مكتبة أسعارها حنينة اوعى تسيبها، خدها فحت وردم، لكن خليك حذر وكل شوية اسأل عن الأسعار أحسن بتوع الأزبكية عندهم زهايمر، ممكن يقلك في الأول جنيه وبعد شويه يعمل نفسه عبيط ويلبسك.
10- وأنت بتحاسب ادعيلى وافتكرنى بكتاب.