سامح فايز يكتب: 10 نصائح ذكية لزيارة سور الأزبكية في معرض الكتاب

يفتتح معرض القاهرة الدولي للكناب دورتة47 في 27يناير المقبل، لكن نظرا لارتفاع سعر الدولار وأن الكتب بقت أغلى من اللحمة أصبح سور الأزبكية ملتقى كل أطياف الشعب ورمز الوحدة الوطنية والتكافل الاجتماعى، يعنى ساكن التجمع الخامس جنب بجنب ساكن الدويقة.
ما أكتبه الآن هو خبرة 14 سنة متابعة لسور الأزبكية ومكتبات الكتب القديمة فى القاهرة، ضعوها فى الاعتبار.
1- إوعى تطلب كتاب بالاسم من البائع، يعرف إنك محتاجه وهتلبس فى الحيط يا معلم.
2- لو لقيت عنوان يهمك وتموت وتشتريه إسأل عن أسعار الكتب إللى فى نفس الركن وأوعى تحسسه إنك قاصد كتاب بعينه.
3- لو صاحب المكتبة قالك كل كتاب بسعر لف وارجع تانى واعلم أنك وقعت فى عباءة حوت هيخليك تبيع هدومك.
4-فى السور بتلاقي كتب للعرض وكتب داخل المكتبة، العب دايما على العرض لأنهم بيجيبو رجلك بعناوين تشد، إنما لو دخلت جوة المكتبة هتخرج مولاي كما خلقتني.
5-اعمل نفسك شحات وإوعى تعمل فيها ابن ناس وبابى ومامى، هيستغل الفرصة والكتاب أبو جنيه هيبيعهولك بالدولار.
6- ما تشتريش من أول مكتبة تقابلك، وخليك متأكد إن تاجر واحد ببيع لكل المكتبات، يعنى الكتاب أبو عشرة جنيه هنا ممكن تلاقيه بجنيه فى مكان تانى.
7- لو عاوز تشترى رواية اشتريها من مكتبة متخصصة فى الكتب الدينية. الرويات عندهم من باب العلم الذى لا ينفع وبيبقوا عاوزين يتخلصوا منها عشان البركة تحل على المكان والعكس صحيح.
8- الكتاب المزور بقى أكتر من عدد سكان قطر فى سور الأزبكية فخلي بالك أحسن تلبسه على إنه كتاب أصلي وهتدفع تمنه الضعف.
9- لو لقيت مكتبة أسعارها حنينة إوعى تسيبها، خدها فحت وردم، لكن خليك حذر وكل شوية اسأل عن الأسعار أحسن بتوع الأزبكية عندهم زهايمر، ممكن يقلك فى الأول جنيه وبعد شويه يعمل نفسه عبيط ويلبسك.
10- ركز نزولك للسور آخر يومين فى المعرض، البياعين بيكونوا جابو جاز وعاوزين يخلصوا من الكراتين اللى هيشيلوها وينقلوها من المعرض اخر يوم.