لعشاق سور الأزبكية

كنت أريد أن أكتب عددا من النصائح لعشاق سور الأزبكية تساعدهم على اقتناص أفضل الكتب بأفضل الأسعار، ولكننى لم أجد عندى أفضل مما كتبه الزميل سامح فايز على صفحته الشخصية، وسأنقله نصًّا:
1- إوعى تطلب كتاب بالاسم من البائع، هيعرف إنك محتاجه وهتلبس فى الحيط يا معلم.
2- لو لقيت عنوان يهمك وهتموت وتشتريه إسأل عن أسعار الكتب اللى فى نفس الركن وإوعى تحسسه إنك قاصد كتاب بعينه.
3- لو صاحب المكتبة قال لك كل كتاب بسعر لفّ وارجع تانى واعلم أنك وقعت فى عباءة حوت هيخليك تبيع هدومك.
4- فى السور بتلاقى كتب للعرض وكتب داخل المكتبة، العب دايما على العرض لأنهم بيجيبوا رجلك بعناوين تشد، إنما لو دخلت جوه المكتبة هتخرج ملط!
5- اعمل نفسك شحَّات واوعى تعمل فيها ابن ناس وبابى ومامى، هيستغلّ الفرصة والكتاب أبو جنيه هيبيعهولك بالدولار!
6- ماتشتريش من أول مكتبة تقابلك، وخليك متأكد إن تاجر واحد اللى بيبيع لكل المكتبات، يعنى الكتاب أبو عشرة جنيه هنا ممكن تلاقيه بجنيه فى مكان تانى.
7- لو عاوز تشترى رواية اشتريها من مكتبة متخصصة فى الكتب الدينية، الروايات عندهم من باب العلم الذى لا ينفع وبيبقوا عاوزين يتخلصوا منها عشان البركة تحل على المكان!
8- أما بقى لو لسه سامع لك محاضرة لمصطفى حسنى وعاوز تتوب يبقى تشترى الكتب الدينية من عند واحد كل كتبه قصص وروايات، الناس دى بتبقى فى الغالب أفضل ف الأسعار.
9- لو لقيت مكتبة أسعارها حنيّنة اوعى تسيبها، خدها فحت وردم، لكن خليك حذر وكل شوية اسأل عن الأسعار أحسن بتوع الأزبكية عندهم زهايمر، ممكن يقول لك فى الأول جنيه وبعد شوية يعمل نفسه عبيط ويلبسك.