عبد الله ناعيا أبو الوفا: ممثل عظيم ظهر متأخرا ورحل مبكرًا

نعى الفنان الكبير صلاح عبد الله الفنان الراحل محمد أبو الوفا عبر صفحته الشخصية بشبكة التواصل الاجتماعي فيس بوك، وكشف عن كواليس جمعته به وكتب قائلا: "عارف يا محمد أنا النهارده صحيت مالنوم الساعة 3م، وأول حاجة قلتها الحمدلله أخيرًا نمت كويس والورم في رجلي فش كتير وحاسس إني اتحسنت صحيًا بفضله وكرمه ومقبل عالحياة بابتسامة جوانية عريضة ولذيذة وعاقد العزم على مواصلة دعم منتخب بلدي في مواقع التواصل وفعلًا بعد الإجراءات العلاجية المعتادة يوميًا فتحت الفيسبوك وأول حاجة شفتها صورتك يامحمد.
#فاكر_يامحمد المرة الوحيدة اللي قعدت فيها معاك قعدة طويلة أثناء التحضير لمشهد يجمعنا في عائلة الحاج نعمان وكل ماتقولي ياأستاذ أقولك ماتقوليش ياأستاذ لإن إنت الأستاذ ووقفت في الأستوديو وقلت بعلو الصوت ياجماعة أنا ليا الشرف والفخر إني همثل دلوقتي قصاد الأستاذ محمد أبوالوفا
#عارف_يامحمد أول مرة شفتك في التليفزيون قعدت أقول لنفسي مين الراجل دا وكان فين الراجل دا وإزاي بيمثل بالحلاوة والبساطة وبالشكل دا الراجل دا وكل مرة كنت بقول نفس الكلام وأنا قاعد قصادك زي التلميذ ياأستاذ.
#فاكر_يامحمد لما قلتلك إنت كنت فين ياجدع إنت وإزاي وليه دانت المفروض تكون في حتة أكبر بكتير ماللي إنت فيها إسمًا وأجرًا وشهرة في حتة أكبر كتير ماللي إحنا فيها أو بالتحديد ماللي أنا وصلت ليها وترد بضحكة عسل مالهاش زي بترن دلوقتي جوايا وإنت بتقولي بطل تواضع ياأستاذ وأقولك تاني ماتقوليش ياأستاذ ودا مش تواضع والله دا إقرار بالحقيقة والله إقرار واعتراف بالحقيقة يا محمد يابوالوفا
#عارف_يامحمد والله العظيم أنا مش عارف ليه كتبت كل الكلام دا في نعيك إنت بالذات ومش عارف ليه لغاية دلوقتي مش قادر أبطل عياط مع إني ماعرفش عنك غير إنك ممثل عظيم ظهر متأخرا ورحل مبكرًا وشفت في عينيه لما قعدت وياه إن الدنيا دي مش فارقة معاه ولإني بدأت أتعب يابوالوفا هختم برسالة ليك ياأستاذ
#فاكر_يامحمد لما قلتلك إنت المفروض تكون في حتة أحسن كتير أهو إنت دلوقتي ياحبيبي في الحتة الأحسن والأفضل والأجمل والأنضف والأبقى والأحلى والأعلى بإذن الله ورعايته ورحمته وفضله وكرمه.
أسألكم الفاتحة والدعاء للأستاذ #محمد_أبوالوفا"
الجدير بالذكر أن الفنان محمد أبو الوفا توفي صباح اليوم بعد تعرضه لوعكة صحية شديدة منذ فترة، دخل إثرها العناية المركزة بالمستشفى.