"البوابة نيوز" في منزل طفل "ربع ساعة يا حاجة".. الأب: الفيديو أصاب نجلي بصدمة نفسية

تداول رواد مواقع التواصل الاجتماعي، فيديو لطفل في الصف الأول الابتدائي وهو يتوسل إلى مدرسته بالسماح له بالنوم قائلا لها: «والنبي ياحاجة سبيني أنام ربع ساعة، ربع ساعة بس وهعملكم اللى عايزينه».
وانتشر المقطع بشكل ساخر من الطفل، "البوابة نيوز"، كانت في منزل الطفل محمد صالح مرسي صالح الكائن بشارع منية السيرج التابع لمنطقة شبرا مصر والتقت والده، الذي أغضبه الأمر قائلا: "ابني محمد الطالب بالصف الأول الإبتدائى يعاني من كسر في قدمه، وقام بفك الجبس قبل المدرسة بكام يوم، وبياخد علاج بيخليه ينام، بدأت المدرسة وقولناله روح ووصلناه وبقي كويس، لكن عشان أول أيام الدراسة والأسبوع الأول الطفل تعب عشان مش متعود، وطلب من المدرسة بتاعته إنه ينام، للأسف صوره المدرس بتاعه، عشان يبقى مادة للسخرية من الطفل".
وأضاف الوالد منفعلا "ابني مش متشرد ولا إحنا ناس متعلمين وحاولنا نخرج ابننا من تعبه في المدرسة، ابني جاتله أزمة نفسية لما عرف إن الناس بتتريق عليه ولما كل ما حد يقابله في الشارع يضحك ويقوله أنام ربع ساعة، إحنا هنقدم محضر في المدرس والمدرسة وكل اللى ساهم في إن الطفل يتم تشويه معنويا".
وتساءل "هل إحنا وصل بينا الحال للسخرية من طفل رايح المدرسة ونتسبب ليه في أزمة هتفضل ملازمة طول حياته؟، ياريت وزير التعليم يرد عليا، إخواته رافضين يروحوا المدرسة بردو وتشوهوه نفسيا حزنا على أخيهم، والولد رافض يروح المدرسة، بسبب اللي حصل، وقالي إن زميله كان بيداري وشه بالشنطة الأول والمدرسة زعقتله عشان يتصور".