"آبلة فاهيتا" و"شريحة المرحوم".. هل تحملان شفرات لاغتيال مرسي؟

بدأت نيابة أمن الدولة في التحقيق إذاعة شركة "فوادفون" إعلانًا على "يوتيوب"، يتضمن رسائل ورموزا مشفرة من شأنها تكدير السلم والأمن العام في مصر.
وفسر العديد من النشطاء على موقع التواصل الاجتماعي "فيس بوك" تحليلًا لفيديو "شريحة المرحوم" للشخصية الكرتونية "آبلة فاهيتا"، فقالت في الإعلان التليفزيوني: "وطى التليفزيون وروحي كملي دعبسة في الصندرة"، اعتقدوا أن هذا معناه قلة الظهور الإعلامي لأى أحد إخواني، والاختفاء عن الأنظار والتخطيط في السر، بعد إعلان الجماعة أنها إرهابية.
و"البنت بتقول الاختبار" محللين ذلك بأنه يخص الامتحانات، وأنهم ممكن يعملوا حاجات في الجامعات وقت تجمع الطلاب في الامتحانات، ودا بدأنا نشوف بوادره في الفترة الأخيرة، من تفجير أتوبيسات الجامعات.
وأن "فريزر يا بطة فريزر" حملة فريزر كانت هجوم من الإنجليز على رشيد، وأعتقد أن دمياط يجوز أن تشهد جزءا من الأحداث الساخنة.
وقالت "ماما توتو؟" أعتقد دى تركيا، طقم سنانها اتجمد فى الكوباية؟، معناه أن تركيا أو أردوغان وزارته ونفوذه فى المنطقة، اتجمد واتشل بسبب التظاهرات اللى حاصلة ضده، الوزارة والأعوان هم طقم السنان، والمنطقة أو الشرق الأوسط هو الكوباية، ودا معناه أن تركيا حاليا وضعها متأزم فى المنطقة، ومش هاتقدر تساعد الإخوان.
وأكدت أن "الساقعة دى ماتشافتش من أيام ديليسيبس" نذكر أن من أكبر الضربات المصرية للمستعمرين كان تأميم قناة السويس على يد الزعيم جمال عبد الناصر، وبما إننا بنقول إن السيسي خليفة ناصر، فده معناه أن الجيش ماشافش رجل قوى وزعيم زى السيسي من أيام عبد الناصر.
أما عبارة "بعت سيكيوريتى البواب" ندهلى الكلب اللى فى جراج المول اللى جنبينا، ريكس البوليسى بييجى يشمشم، ويطلعلك الضايع وبياخد نسبة، اعتقد المقصود هنا جهاز مخابرات شقيق، إما القطرى وإما الليبى، ودا معناه أنهم استعانوا بالمخابرات القطرية عشان تفيدهم فى الورطة دى، بس ماقدروش يوصلوهم لحاجة، ب "س طلعلى فردة صندل كانت ضايعة" اعتقد أنهم فشلوا فى تهريب مرسى، ولكن نجحوا أنهم يهربوا عناصر تانية كانت على وشك القبض عليها، وأكدوا أن "فتشتى فى لكلوكة؟؟" اللكلوك للقدم، يعنى مراقبة تحركات، و"فتشتى فى محفظته" يعنى تسريب معلومات، فيما دللت عبارة "ياقته الدراكولا؟" علي الياقة التي تخص الرقبة، حيث انه المطلوب مراقبة تحركات وتسريب معلومات لحدوث عملية اغتيال.
أما جملة.. "بودى كل الشريحة" اعتقد دا معناه، كلمة شريحة، قد تعنى شريحة فى المجتمع، يعنى دايما بنقول إن الأطباء مثلا شريحة من المجتمع، فجايز الكلام أن بودى أكل الشريحة؟، يعنى (عبد الفتاح) السيسى قضى على الجماعة، وهيا بتقول بندور على شريحة المرحوم قبل ما يبقى مرحوم، يعنى بندور على لم شتات الجماعة، قبل مرسى ما يبقى رئيس والجماعة تضيع.
"وقالت في الاعلان التلفزيوني .. أنا كلمت الشيخ الالوسى؟"، اعتقد دا حاكم قطر، وأن "هوا خلى المرحوم يجيلها فى المنام" يعنى وصلها رسالة، "بس اتشد على طول مالحقش يقولها الشريحة فين"، يعنى خط التواصل بينهم قفلته المخابرات قبل ما توصلهم معلومات تانى بكيفية لم شمل الجماعة.
أما عبارة "البالطو البيج" كان تحليلها "سيناء الصفراء"، و"فتأتى بطانته؟" يعنى استخدام البطانة.. وهى شىء داخلى يعنى الإنفاق، "عضعضتى ياقته؟" اعتقد دا المقصود بيه الحدود، والفكرة هنا توصيل الرسالة للموالين فى سيناء، بالتحضر فى عملياتهم واستمرارها، وفى نفس الوقت استخدام السياسيين فى دورهم، بدليل بتقولها فتشى فى طقم البيبيوهات، اعتقد دا جمع بيبيونة. ودى بتتلبس فى البدل الرسمية، يعنى السياسيين والنخبة، أمثال حمزاوى وأيمن نور والبرادعى، بمعنى أن الإرهاب يستمر فى سينا، والضغط السياسى يستمر من خلال السياسيين.
وجملة "الشريحة بيقولوا عليها أوفر وهدايا" دا معناه أنه فى تمويل خارجى كبير، وأنه فى وعد بمكافآت كبيرة من دول خارجية، فى حالة لو الجماعة قدرت تجمع نفسها، وقدرت تخرب مصر وقتها الهدايا هاتوصلهم وهاتكون كتير.
وقد حمل الإعلان تفسير أخر، حيث أكدوا أن فاهيتا بتقول "فكيتى فريزر يا بطة فريزر بيقولوا السائعة دى ماتشفتش من أيام الدليسبس" فاهيتا بتمثل جماعة الإخوان، أو الشخص اللى بيدير التفجيرات اللى بتحصل "السائعة" بتمثل الأحداث اللى بتحصل لجماعة الإخوان، وإنها محصلتش من أيام "الدليسبس" الدليسبس المقصود بيه جمال عبد الناصر بما أنه صاحب قرار تأميم القناة، وهو اللى كان بيحط الإخوان فى السجون.
و قد ظهرت كارو بعد ما كانت بتدور على الشريحة، والشريحة في الإعلان بترمز لأدلة إدانة مرسى وتورطه مع أمريكا في قضية التخابر، وفاهيتا بتقولها "فتشتى البلطو البيج" واللي بيرمز للجيش أو المخابرات، وبعدين بتقولها "روحى دورى فى رف الببلوهات" المقصود بيها وزراء حكومة الببلاوى اللى عينها البرادعى بمعنى أصح بتقولها شوفيهم قدروا يوصلوا لمكان الأدلة ولا لأ، وبعدين كارو بتهمس، وبتقول "بودى كل شريحة" بودى تقصد بيه الببلاوى على حسب تويته لكارو كانت بتقول "بودى عمل قانون تظاهر على روحه" يعنى الببلاوى عمل قانون التظاهر مجبر بسبب الضغط اللى كان عليه من وزير الداخلية. أما "بودى كل شريحة" فتقصد بيها محاولة بودى لإخفاء أدلة إدانة مرسى.
فاهيتا بتقول "دى كركورة بتبرطم على شريحة المرحوم مش لقياها؛ شريحته من قبل ما يبقى مرحوم" كلمة المرحوم بتشير لمرسى لأنهم هيحاولوا يغتالوه علشان يبقى الشرارة اللى هتعمل 25 يناير 2014 وبالمرة يمنعوا محاكمته وميتفضحوش، أما شريحته فزى ما قولنا إنها أدلة إدانة فى الغالب هو مستند بيدل على اتفاق حصل بين مرسى أو الإخوان وأمريكا. وبعدين بتقول "عليها أوفر وهدايا"، واضح أن فى مكافأة لو توصلوا للشريحة أو الأدلة.
فاهيتا بتقول "الشيخ الالوسى" ودا شيخ فى العراق واستخدام اسمه هنا بيرمز لعناصر من القاعدة، لأن القاعدة حاليا متوطنة فى العراق، و"بتقول كلمته يبعت للمرحوم يطلعله" لما هيطلع المرحوم (مرسى) من السجن وهو فى طريقه للمحاكمة هيتم هجوم بعناصر انتحارية على موكب نقله أو هيتم استهدافه بعملية انتحارية، أو سيارة مفخخة، لأنها قالت في الجملة اللي بعدها "على طول جالي في المنام عرقان ومهبط و بتقولي انتوا بردانيين ليه ده الجو صهد نار" وده معناه أن المرحوم تم تفجيره عشان كدا حاسس بالجو صهد نار. وبعدين بتقول "لاء شدوه قبل ما يقولى دافس الشريحة فين" شدوه يعنى حبسوه من غير ما يعرفها مكان الأدلة اللي بالتأكيد تم ضبطها.
وبعدين بتقول "ريكس بوليسى بيجى يشمشم ويطلعلك الضايع وبياخد نسبة" وده إن دل فهو بيدل على اختراق أمنى فى الداخلية وشوفنا نفس الموضوع حصل لما تم اغتيال محمد مبروك الضابط المسئول عن قضية هروب مرسى من وادى النطرون، فأكيد تم دفع رشوة لذوى النفوس الضعيفة، وده المقصود ب "بياخد نسبة"، وبعدين بتقول "دورلى فى كل حتة بس طلعلى فردة صندل كانت ضايعة" وده فى الغالب بيشير لحادث اغتيال الضابط محمد مبروك.
فاهيتا بتقولها "فتشتى فى لكلوكه الأسمر" ودى ممكن تشير للشرطة، "طيب محفظة الكروكوديلا" ممكن ترمز لمنزل أو مكتب وزير الداخلية، "مخبيها فى الطقم الدراكولا" ممكن ترمز للأمن الوطني.
وفى نهاية المشهد، تظللت شجرة الكريسماس باللون الأحمر واللي بيشير للدم ولضحايا التفجير اللي ممكن يحصل فى أحد الكنائس في احتفال رأس السنة الميلادية.
في البداية .. قال اللواء محمد نجيب الخبير الأمني ومساعد وزير الداخلية الأسبق في تصريحات ل"البوابة نيوز"، إن جماعة الإخوان الإرهابية تلجأ إلي أي فرصة وأي وسلة غير مرصودة، لإحداث عمليات تفجيرية أو اغتيال شخصيات سياسية، بعيدًا عن رصد الأمن لها، مؤكدًا أن "الرسائل المشفرة"، هي التي تقوم بحل مشاكل تعقب الأمن لها، لأن جميع رسائل أعضاء الإخوان مراقبة من الجهات الأمنية ك "فيس بوك" و"تويتر" "والهواتف المحمولة" و"الواتس أب" وغيرها.
وأضاف نجيب أن جماعة الإخوان الإرهابية تسعي إلي اغتيال مرسي، وستحاول أكثر من مرة بأي وسيلة ممكنة لاغتياله، لأنه يحمل أسرار عديدة للتنظيم الدولي للإخوان، وأسرار الجماعة وفترة حكمها لمصر، ولكن قطاع "الأمن الوطني" يسعي لرصد تلك المحاولات واحباطها، ورصد جميع الرسائل المشفرة وغير المشفرة لإنقاذ مصر.
فيما قال اللواء سيد الجمل، مساعد وزير الداخلية الأسبق، أن جماعة الإخوان تسعي إلي توصيل رسائل معينة إلى أنصارها، وذلك للربط بينها وبين الأحداث الجارية والمتوقعة، لإحداث حدث معين، من شأنه إشعال الوضع السياسي والأمني في مصر.