مصطفى خاطر: بحب عادل إمام.. وتعرضت لمواقف سخيفة

قال الفنان مصطفى خاطر: نجمي المفضل في الكوميديا الزعيم عادل إمام، ودا من صغرى بعشقه وبيضحكنى، وكمان محمد سعد ملك الضحك، ومحمد هنيدى، فهؤلاء نجوم كبار فى الضحك، وأكيد أسماء تانية زى أحمد حلمى وكريم عبد العزيز، اللى بحس إنى شبهه، وبحبه جدا، فالحمد لله عندنا نجوم كبار فى الضحك ومواهب كوميدية عملاقة.
واضاف خاطر ل"البوابة نيوز"، أنه لا يوجد ممثل لم يمر بمواقف صعبة، وكل منا مر بمواقف «رخمة»، و«سخيفة»، خاصة فى بداية المشوار المهني، مثلا رايح تشتغل فى مسلسل بيطلب منك أوردر: «تعالى دلوقتى»، وبيدوك ورقة ويقولولك «خش قولها»، ومفيش لا مخرج أو حتى مساعد مخرج يقعد معاك يفهمك، وتلاحظ أنه قبل ما تتعرف، الناس كلها بتكون متضايقة منك من غير سبب، وبيضحكوا عليك ويتريقوا خلف الكاميرات، مع أنك المفترض ممثل مبتدئ ولسه فى بداية التمثيل، أكيد مش بروفيشنال وطبيعى إنك تغلط، ومش عارف مثلا مكان إضاءتى أو المارك اللى أقف عندها، ولحد دلوقتي بشوف ناس بيتعمل معاها المواقف دى، بس للأسف التفاصيل دى بتضايق جدا، وممكن تخلى أى شخص ميكملش فى التمثيل حتى لو هو موهوب.