حد يفهمنا، معلش ثقافتى على أدى ومش فاهمة وعايزة حد يفهمنى، وأكيد في ناس كتير زي حالاتى مش فاهمين، مش فاهمين إيه اللي بيحصل في بلدنا وعايزين حبايبنا من ذوى الخبرة والعقول النابغة والمسئولين اللي أصبحوا غير مسئولين يفهمنا ويفهم الناس الكلام اللي بيتقال ومش فاهمينه. حد يفهمنا، فكة دى ولا مش فكة؟ يا متعلمين يا بتوع المدارس، الإجابة بسم الله الرحمن الرحيم «فكة». طيب بما أن الإجابة صح.. إيه العيب في كده إحنا عندنا وجهتين نظر واحدة بتقولك في أوروبا والبلاد المتقدمة والعالم كله، بنلاقى صندوق زجاج الناس بتسيب فيه الفكة «باختيارها». بس مكتوب على الصندوق التبرع ده لإيه يعنى للمرضى المعاقين أو للأطفال المصابين بالسرطان أو لإنشاء مستشفى أو أو.. بمعنى آخر محدد الاتجاهات والمشاريع. طيب الخطاب الذي أدلى به الرئيس السيسى لما طالب البنوك بالفكة وقال «إزاى معرفش»، المهم أنه عايز الفكة دى. طيب حد يفهمنا يا سيادة الرئيس عايزينها لإيه بالظبط؟ ويعنى إيه عايزينها للبلد؟ في إيه للبلد يا فندم. ومش عيب أن إحنا نساهم في بناء البلد بالفكة، بس العيب أن إحنا مش عارفين الفلوس دى بتروح فين ولمين، يعنى بعد مبادرة «صبح صبح يا عم الحج على مصر بجنيه أو بخمس جنيه». يعنى أنت وذوقك لإقامة مشاريع لبلدنا حلو أوى بس حد يفهمنا لماذا لم تعلن الدولة عن حجم المشاريع التي أقيمت بصندوق تحيا مصر «صبح صبح»، أو التبرعات التي جاءت من دول الخليج التي تعد بالمليارات لمساعدة مصر اقتصاديًا وأين ذهبت هذه الأموال؟ «مفيش شفافية سعادتك».. الرأى الثانى في موضوع الفكة ده اللي أثار سخرية الشباب على مواقع التواصل الاجتماعى حد يفهمنا ليه يا شباب مش عيب أن المواطنين تساعد ولو بالفكة في بناء البلد. حط القرش على القرش يبقى قرشين وطوبة على طوبة خلى الفكة موجودة. بس زى ما قلت هناك رأى آخر بيقول ليه الحكومة بتحط أيديها في جيب المواطن البسيط عمال على بطال دى حتى الفكة ناس عايشة بيها بالتيلة مرتباتهم فكة. حد يفهمنا استثمارات مصر ستعتمد بعد ذلك على الفكة، أين الحكومة من الخطط الاقتصادية لبناء البلد بدلا من فرض ضرائب على كاهل المواطن، مع جنون الأسعار وهبل الخرفان والشحاتة في مصر، وبقاء المرتبات كما هي في الفريزر متجمدة. حد يفهمنا لماذا لا تقوم الدولة بتحصيل الضرائب المتأخرة من رجال الأعمال مع الفكة ياعم الحج؟ إحنا ليه جايين على الناس البسطاء وسايبين الوحوش اللي نهبت مصر، ومتقولش إيه أدتنا مصر قول سرقنا إيه من مصر. حد يفهمنا ليه الحكومة مشغولة بالجباية على المواطن المصري، ومش مشغولة بما يحدث بالنسبه لصادرات مصر من الفاكهة والموالح والخضروات وبعض المنتجات الغذائية، ورفض بعض الدول استيراد الفاكهة والموالح من مصر زى أمريكا وروسيا «المؤامرة» زى الحكومة ما بتقول طيب لو دى مؤامرة من الغرب ماذا عن الدول العربية كالسعودية والسودان طيب دى مؤامرة كمان «الناس دى ظلمانا والله إحنا أكلنا وفاكهتنا وموالحنا مية مية، ولا مسرطنة ولا فيها فيروسات كبد وبائى ولا حاجة، والمياه شفافة ونضيفة، مش بنرويها بمياه المجارى والبلاعات حاجتنا بيضا». حد يفهمنا إيه اللي بيحصل بالظبط مالها الفراولة ياحكومة، إيه اللي حصل في دول العالم إيش بيها؟ حد يفهمنا أنتم شاغلين الناس بارتفاع الأسعار وبالفكة وغيرها ومفيش حد ابن حلال طلع يقول لنا إيه المشكلة علشان دى مصيبة. أهم من الفكة. حد يفهمنا إذا كانت الدول الأوروبية والغرب وبعض الدول العربية قامت بعمل حظر على الخضراوات والفاكهة وعلشان الناس متزعلش بعضهم وده المفروض أحسن شيء بيصدر من مصر أمال إحنا بناكل إيه؟ اتقوا الله في شعب مصر، فاهمين ولا محتاجين حد يفهمنا؟ ابعتولى لو في حد مش فاهم حاجة وعايز يفهمها وإحنا معاه، لأن أكيد في حاجات كتير أوى محتاجين لحد يفهمهلنا. [email protected]
