وبعديييين؟ إحنا رايحين على فييييييييين؟ أسئلة بتطرح نفسها، أقسم بالله العظيم أنا ما فيش حد بقابله أو بقعد معاه اليومين دول مهما كان سنه أو مركزه إلا وبيسأل الأسئلة دى وعنده حالة غريبة من التتنيح والسرحان فى اللى جاى، ما حدش فاهم حاجة ولا عارف حياته رايحة على فين، اللى عنده شغل خايف عليه، واللى ما عندوش نفسه يبقى عنده ومش خايف ما يلاقيش شغل بس لأ ده خايف إن مصر كلها تتلغى من على الخريطة أصلا وتبقى كذا مصر؛ شمالية وجنوبية، إسلامية ومسيحية ويبقى لا بقى عنده شغل ولا بقى عنده بلد تلمه أساسا وكله بشرع الله. فيه حالة خوف مش طبيعية بقت على وشوش الكل، خوف من كل حاجة وعلى كل حاجة، الناس عايزة تسيب البلد وكله بيظبط حاله، اللى بيظبط فى دبى واللى خلاص ظبط فى أمريكا وكله بقى تمام، بس تفتكروا إن السفر ده هو الحل اللى هيلغى الرعب اللى فى عيون الناس، طب وبلدنا إيه يا جماعة؟ خلاص؟ هنتفرج عليها فى التليفزيون؟؟؟ بس أقولكوا على حاجة، المشكلة مش فى الناس اللى قدروا يسافروا المشكلة فى الغلابة اللى لا هيعرفوا يسافروا ولا يعملوا حاجة غير إنهم يفضلوا مكانهم ويستنوا مصيرهم ودول اللى لبسوا بجد. رسالة إلى كل اللى ظبط أو بيظبط حاله بره مصر قبل ما تسافروا فيه حاجات مهمة لازم تعملوها زى ما عرفتوا تخرجوا فلوسكم بره، لازم تنزلوا تصوروا شوية حاجات (الأهرامات، أبوالهول، النيل، الشوارع، الميادين، بيتكوا القديم....) وأى مكان تانى ممكن يوحشك وده مش علشان أى حاجة خالص غير إنك مش هتلاقى الحاجات دى تانى وهتبقى شوية الصور دى هى الحاجة الوحيدة اللى فاضلالك عشان تعلقها على الحيطان وتوريها لولادك وتحكيلهم عن مصر اللى كانت موجودة زمان وبوظها شوية خرفان. سيدى الرئيس حضرات السادة الوزراء: الشعب ماشى، إنتوا إيه بقى؟ قاعدين؟ ماشى اشبعوا بيها بس يا ريت تشبعوا وتبقى فرصة تعملوا كل اللى إنتوا عايزينه، بيعوا قناة السويس وبيعوا سينا إيه يعنى نبيع سينا اللى مات بسببها مصريين كتيير ولا حتى قناة السويس مش مشكلة نديها لقطر آهى برده ما رحتش لحد غريب. سيدى الرئيس محمد مرسى: أمامك فرصة ذهبية إذا أردت إنقاذ مصر والحفاظ على شعبك من الهروب وأن توقف نزيف الدم الذى غطى أسفلت الاتحادية والتحرير الحل بسيط إما أن تعمل لمصر ولصالح المصريين أو تتنحى زى اللى قبلك.