أبوالقمصان للمرأة العاملة: "إحساسك بإنك أفضل من جوزك غلط"

تواصل نهاد أبو القمصان، رئيس المركز المصري لحقوق المرأة، تقديم حلقات البرنامج الإذاعي "هي وأخواتها"، حيث ناقشت في الحلقة الخامسة لها تكامل الرجل والمرأة وبناء وحدة فيما بينهما قائمة على روح التعاون والمشاركة.
في بداية حلقتها قالت أبو القمصان: "النهارده الظروف الاقتصادية والتغيرات اللي حصلت خلت الحياة بقت صعب إن يشيلها شخص واحد، وبالتالي مهم أوي إن الاتنين يشتغلوا عشان نحسن مستوى المعيشة وجودة الحياة"
وعاتبت السيدات قائلة: "بس أنا ليا عتاب صغير على الستات، هيا بتشتغل صحيح وبتحط دخلها كله في البيت، ده حقيقي، بس طول الوقت عندها إحساس بالتفضل، وكأنه الزمن الوحش اللي خلاها تشتغل.. في الحقيقه لا".
وأضافت أبو القمصان، أن "الإحساس بالتفضل هنا مش في موضعه أبدا لأن إحنا اتخلقنا عشان نبني وحدة كاملة مع بعض وإن أي حد فينا يقدر يساهم في الحياه يقدر يساهم فيها ممكن نقعد مع بعض ونتفق إحنا دخلنا على بعض قد أيه وكل واحد محتاج جزء شخصي ليه قد أيه، وبالتالي يبقي بينا حتى روح التعاون والمشاركة دي جيدة، وأما ببص حتى في كتب السنة رغم أنها حفظت للستات ذمة مالية مستقلة تقدر تتصرف في فلوسها زي ما هيا عايزة لكن "الأقربون أولى بالمعروف".
وتواصل حديثها قائلة: "لقيت أحاديث كتيرة بتتكلم عن صحابيات لعبوا دور مهم جدا لما كانو أزواجهم محتاجين ماكنِتش مضطره تعمل ده، ولا تفضلت عليه بده.. يعني شوفنا حديث عن امرأة عبدالله رضي الله عنه راحت للرسول لما قال: تصدقن يا معشر النساء ولو من حليكن، يعني لو من دهبك وحاجتك، يعني أن اللي جوزها رقيق الحال فايهما أولى، تتصدق بره البيت ولا تساهم معاه في البيت، وراحت لجوزها وقالتله الكلام ده وان ده هيحسب من حسانتها وصدقتها واجرها لكن الأجمل يحسب في العشرة والعلاقة الجميله اللي ما بينهم".
ووجهت رسالة للرجال قائلة: "أحيانا كتيرة رجالة بيبقي عندهم رفض داخلي للموضوع ده ورغم أن الواقع بيفرض علينا إحنا الإتنين أننا نشارك إنما يفضل طول الوقت يقولها إنتي مبتعمليش حاجه أنا مش عايز منك حاجة متحطيش في البيت حاجة.....أنا عايزة أقولك الطريقة دي مش حلوة أوي يعني بتحبط شوية هيا كده كده مش ممكن تشوف البيت محتاج حاجة وهيا عندها دخل ومتحطش ومش ممكن الولاد يكونوا محتاجين حاجة وتستخسر فيهم فالكلمة الطيبة صدقة فإذا الست تصدقت من مالها وتشاركت و نبني مع بعض حياة تصدق أنت بكلماتك الطيبة وقولها تسلميلي ربنا يخليكي لينا إحنا مع بعض الكلام ده بيعمل فعلا مودة ورحمة بين الإتنين وربنا يديم المعروف".
يذكر أن برنامج "هي وأخواتها" يهدف إلى دعم المرأة المصرية ومساندتها ومناقشة القضايا التي تمس المجتمع بشكل عام والمرأة بشكل خاص، ويعتمد على قالب الحديث المباشر وتقديم الحلقة بأسلوب مبسط وخفيف وباللغة العامية، كما يعتمد على الحكى لقصص ومواقف تحدث للسيدات، وذلك لمناقشة موضوعات وقضايا هامة.
رابط الحلقة الخامسة من برنامج هي وأخواتها