نهاد أبو القمصان تكشف سر "رغي الستات": مخهم شغال أكتر من الرجالة

تساءلت نهاد أبو القمصان، رئيس المركز المصري لحقوق المرأة، في الحلقة الثالثة من البرنامج الإذاعي "هي وإخواتها"، قائلة: "ناس كتير بتقولك إن الستات رغاية أوي وبيحبوا الكلام.. هو ده حقيقي ولا لأ؟".
وقالت: "سألت بعض العلماء قالوا الستات عندهم نظرية كدا إن مش عارفة الفص الأيمن عند الستات بيشتغل أكتر لأن هو ده بيركز على المهارات الكلامية لكن عند الرجالة الفص الأيسر حاجة كدا يعني مفهمتهاش. ودايما بيدللوا على ده أن الأطفال الصغيرين البنات بتتكلم قبل الولاد برضو مفهمتش اوي، يعني انا مخلفة بنات وولاد ومركزتش مين اتكلم قبل مين، بس في كل الأحوال حتى دي لو كانت حقيقة بيولوجية في نظريات بقا لها علاقة بعلم النفس بتتكلم عن الموضوع ده بيقولوا أن فيه فروق فعلا ما بين الستات والرجالة في موضوع الكلام ده. لأن بيقولوا أن الستات دايما بتركز على بناء العلاقات والمشاعر ودي حاجة بتحتاج شرح كتير ووصف كتير، يعني لما تجي تحكليك موضوع حصل تقولك فلان كان زعلان وفلانة زعلانة وتركز في التفاصيل، لكن الرجالة بتركز اكتر على توصيل المعلومات المحددة أو اعطاء اوامر مش عارفة مين عامل ايه وده صح ولا غلط، قالك أن الستات بتبقي معنية أوي بمشاعر اللي نحوها واصحابها وقرايبها وزوجها ودرجة رضاهم عنها، هي معنية أوي إنها تبقي الحبوبة واللطيفة فبتبقي طريقة تواصلها فيها شرح كتير وكلام كتير، أما الراجل بيهتم اوي أن يبقي عنده نقط محددة وميقدمش تفسيرات كتيرة، قالك الستات بتركز كتير على تفاصيل الحياة بمعني انها تحلل وترتب وتدقق ده بكام وده اتعمل ازاي وده راح فين فتلاقيها طول الوقت بتسأل اسئلة كتيرة هل ده بيدخلنا في خلافات أو صراعات؟".
وأضافت أبو القمصان: "يمكن الاستفادة من هذا في الحياة عامة، نقدر نقسم نفسنا كدا واحنا في الاسرة والشغل والحياة أن عندنا فريق يبص على القيم الكلية على الإطار الواسع وفريق تاني دقرم يدخل في التفاصيل ويركز على التفاصيل، في مثل انجليزي بيقول الشيطان يكمن في التفاصيل. ده مثل مهم اوي فكل ما حد اهتم بالكليات وكمل رؤيته بحد تاني بيهتم بالتفاصيل نخرج بنتيجة افضل عشان كدا كل ما اتشاركنا في البيت على إدارة الحياة أو في الشغل على اتخاذ القرار كل ما كانت النتيجة احسن".
جدير بالذكر أن برنامج "هي واخواتها" يهدف إلى دعم المرأة المصرية ومساندتها ومناقشة القضايا التي تمس المجتمع بشكل عام والمرأة بشكل خاص، ويعتمد أسلوب الحلقة على تقديم الرسالة بشكل مبسط وخفيف وباللغة العامية، كما يعتمد على الحكى لقصص ومواقف تحدث للسيدات، وذلك لمناقشة موضوعات وقضايا هامة.
سؤال الحلقة: من هي السيدة التي كرمها الله سبحانه وتعالي بتخصيص سورة في القرآن باسمها؟
للاستماع للحلقة اضغط هناااااااااااااااااااااا