إزاي تتعامل مع شخصية بتخاف من الحسد؟

- من الأساس بلاش تتعامل مع الشخصيات دى أسهل وأريح.. بس لو اضطريت يبقى تعمل اللى هقولك عليه.
- إوعى حسك عينك تقوليلها كلمة مجاملة!! من نوع إيه الجمال ده أو اللبس ده شيك... اوعييييييي!!! هتلاقيها نزلت إيدها جنب جسمها وبدأت تدور على خشب وإيدها هتترعش لحد ما تلاقى ترابيزة وهتخمس من تحت لتحت وتتمتم ببقها وهتسمعى سورة الفلق بودانك وهى بتقراها عشان خايفة منك.. والنفس بتاعها هيتسارع لدرجة أنها هتبقى مفضوحة أوى مع إنك قولتى عشرين مرة بسم الله ما شاء الله!!!
اوعى تقوليلها كلمة حلوة لحسن تلبسك تهمة.. بلاااااها.
- نصيحة أخوية اعمليها unfollow على ال«فيس بوك».. أصل كل بوستاتها خرزة زرقا وكفوف بتخمس وستاتس من بتاعة «سيبونى فى حالى يا كفرة» مش هتضيفلك أى حاجة.. بالعكس هتحسى بكمية توتر غريبة لما تشوفى البروفايل بتاعها!!! وغالبا هتلاقى اللى بيعمل لايك ليها باباها ومامتها بس.
دى كل كلامها بتدعى على شخص أو بتحسبن على حد!!!
- كل الصور عندها صور أشلاء بشرية!!! أو أعضاء متقطعة!!!! إيشى صباع محروق أو دراع مكسور أو ضرس مخلوع فى طبق أو عيل من العيال بيرجع ومصوراه فيديو!!!! على عقلة صباع بتخر دم!!!!! احنا ناقصين هم وأرف!!!!
كلها مأساويات والله أعلم حقيقة والا تأليف عشان تخزى العين!!!
- تبقى غبية لو كتبتيلها كومنت على صورتها أو صور ولادها ونهارك مطين لو صورتها هى وجوزها، هتجيبى لنفسك مصيبة ديليفرى لحد عندك!!! فنرجع ونقول unfollow أو unfriend.
انتى هتتجننى وتقوليلها ربنا يحفظكوا!!! هتلاقى بعدها بربع ساعة رزعاكى واحدة «منها لله اللى كانت السبب فى خناقتى انا وجوزكى... وكنا هنتطلق بسببك والكلام ده»!!!
- لو لابسة دبلة جديدة ولا تقولى مبروك.. اعتبريها لابساها ترويش!!!
لو بطنها قدامها 10 متر اعتبريه انتفاخ... اوعى تهتمى.
لو شايلة بيبى على إيدها.. اعتبريه ابن اختها.. اوعى تسألى.
- لما تشوفى ولادها اعملى نفسك اتعميتى، آه اتعميتي!! كإنهم فراغ..مفيش إزيك يا حبيبى ولا الهبل ده.. ولو كلموكى اعملى انك اتطرشتي!!
ما توجهيلهمش ولا كلمة.. عارفة ليه؟؟ لو بودى ابنها بعد 6 سنين كان لازم يشيل اللوز هتجيبها فيكى لما شوفتيه وهو بينادى اخته بصوت عالى فحسدتيه على حنجرته ولوزه العسل دول!!!
- ما تحاوليش تختلطى معاها أو تروحى بيتها.. خلى العلاقة سطحية وياريت كل كلامكوا يكون عن أهمية الخرز الأزرق وتأثيره فى المجتمع.
- ما تاخديش كلامها ثقة.. اللى بيخاف من الحسد مش بيكون دوغرى..بيتوه ويلف ويدور وممكن يوصل للكدب.. فمتركزيش مع كلامهم.
- لو كل لبسها أزرق فى أزرق ما تسأليهاش ليه.. معروفة.. هتلاقيها لابسة خاتم كف مدور وسلسلة مكتوب عليها عين الحسود فيها عود..سيبيها فى اللى هى فيه!!!
الناس اللى فكرة الحسد مسيطرة على حياتها لدرجة إنها بتنسى تتحصن بالقرآن الكريم وملهية فى جو الكف والشباشب والحوارات دى بتشوف كل اللى حواليها باصينلها فى أى حاجة.
فالناس بتضطر يبعدوا عنهم عشان محدش ناقص تهم على الفاضي!!
الحافظ هو الله والحامى هو الله والناس أقصى حاجة بيعملوها أنهم بينفذوا مشيئة ربنا.
الحسد مذكور فى القرآن والتحصين منه فى القرآن برضه مش بالخرز واتهام كل البشر بأنهم قاعدينلك مربعين وموراهمش حاجة غير يحسدوكي!!!!!