أسامة كمال: بعد إنجاز قناة السويس خلال عام "اللي خايف يروح"

قال الإعلامي أسامة كمال، "بيان على المعلم جملة عارفها كل واحد دخل الجيش المصرى، لأنه أدرك أن المعلم هو قائد المجموعة سواء كانت كبيرة أو صغيرة لإنه يبين لهم كيف يبدأوا أى شئ قبل تنفيذه".
وأضاف، عبر برنامجه "القاهرة 360"، المذاع على شاشة قناة "القاهرة والناس" الفضائية، "فى الجيش لما تسمع جملة بيان على المعلم بتفهم إنه بيقطع عليك طريق الاعتذار لما تغلط، السبب أنه علمك كويس قبل ما يطلب منك تنفيذ أى حاجة".
وتابع، "جملة "بيان على المعلم حسيتها وبقوة لما شفت مشروع القناة بيكتمل، حسيت إنها الرسالة الحقيقية وراء إنجاز قناة السويس بالسرعة دى والجودة دى والعزيمة دى".
وأكمل، "درس قناة السويس الجديدة وهو بيكمل قدام عينينا، مش لازم نشوف غير أنه بيان على المعلم بتقدمه القوات المسلحة وبيقدمه الرئيس لكل القطاعات فى مصر عشان الكل يعرف إن مفيش حاجة صعبة ولا مستحيلة وكمان مفيش أعذار".
وأوضح كمال، "الشغل انتهى فى قناة السويس قبل ميعاده والبيان على المعلم كان كافى جدا لكل واحد بيفكر يقول أصل الظروف أصل المشاكل، الشغل خلص والظروف موجودة والمشاكل موجودة ومحدش سمع فى سنة كاملة واحد بيقول كلمة مشاكل، الدرس اكتمل، والبيان على المعلم خلص، وللكل مفيش فرصة للأعذار، واللى خايف يروح".