ميداليات الصلصال.. أحدث صيحات الموضة

قطع من الصلصال الصغير بأشكال متنوعة وألوان مبهجة تُخرجها فتاة من فرن حراري، ثم تركب بها قطعة من الحديد لتصبح ميدالية بسيطة وأنيقة.. فكرة جذبت العديد من الشباب ما شجع «مها» على إنتاج أشكال جديدة حتى توسعت فى صناعة الإكسسوارات مستخدمة الصلصال الحراري.
مها عاطف الفتاة العشرينية تميزت فى صناعة الميداليات والإكسسوارات يدويًا باستخدام الصلصال الحراري، تتحدث عن فكرتها «من زمان وأنا أكتر وأبسط الحاجات اللى بعملها وبيكون ليها تأثير كبير هى أنى أبسط الناس اللى حواليا، فى الأول بدأت أعمل ميداليات على شكل وجوه مبتسمة من الصلصال الحراري، الفكرة عجبت ناس كتير عشان بيدوها هدية للناس اللى بيحبوهم وعايزينهم يبتسموا».
«صلصال» اسم أطلقته «مها» على مشروعها لإنتاج الإكسسوارات المصنوعة يدويًا متحمسة لفكرة تشجيع الصناعة المصرية، تقول «عملت أشكال جديدة سميتها يلويز، وهى أشكال مبتسمة شبه التعبيرات المستخدمة على الفيسبوك، بس مجسمة أكتر وألوانها مبهجة وأشكال أكتر، وبعمل أشكال جديدة على شكل فوانيس رمضان بألوان حلوة».
صعوبة صناعة الأشكال تكمن فى أن كل قطعة من الصلصال يتم مزج ألوانها وتشكيلها على حدة بحسب «مها» التى أنتجت أشكالا كثيرة تتناسب مع مختلف الأذواق، وتردف «أى حد يقدر يطلب أى شكل يحبه بالألوان اللى تعجبه، عشان يقدر ينشر السعادة على وجوه الناس اللي بيحبهم».