"شيتوس" يوضح أسباب أزمته مع أحمد عيد عبد الملك

فسر وائل رياض "شيتوس" لاعب النادي الأهلي المعتزل، أزمته الأخيرة مع أحمد عيد عبد الملك، لاعب نادي الزمالك، التي بدأت بما كتبه شيتوس، على على حسابه الرسمي، على موقع التواصل الاجتماعي "فيس بوك": "النهاردة فسيخ وملوحة، وبكرة يعملها سموحة".
ورد عيد اليوم بعد الفوز على سموحة،:" ناكل فسيخ ناكل ملوحة، شيتوس اتروق هو وسموحة".
وعلق شيتوس على الأزمة قائلًا:" بصوا يا جماعة علشان انا شايف لغط كتير جدًا من إمبارح وكلام كتير عن البوست اللي انا كتبته، البوست انا شايفه عادي جدًا مفيهوش أي تريقة على حد سواء نادي الزمالك أو ادارته أو لاعبته أو جماهيره لكن هي جت بظروف احتفالات شم النسيم واكل الفسيخ وكده يعني القافية طلبت، وانا اسمي وائل رياض اللي كان بيلعب في الأهلي فعادي جدًا ومنطقي إني أبقي عايز الزمالك يتعطل والأهلي يحاول يلحقه".
وتابع: "موضوع الحيادية اللي الناس بتتكلم عليها دي على الشاشة فقط يعني أنا على الشاشة ملك كل الناس بمختلف انتماءتها وكمان دي مش صفحة البرنامج دي صفحتي الشخصية يعتي من حقي اقول ارائي الشخصية ووجهات نظري طالما اني مش بسئ لحد، وموضوع إني حراق وإني بعمل كده والهيافة دي ماليش فيها علشان دماغي وتفكيري أكبر من كده".
وأضاف: "ناس كتير زملكاوية كلمتني بكل ادب واحترام وتفهموا وجهة نظري وناس تانية شتمت وقلة أدبها وكل واحد بيعبر عن بيئته، وأحمد عيد صديق وعشرة وموضوع البوست اللي كتبه يسأل هو عنه لكن أنا مش من عادتي أعلق على أصدقائي على صفحات التواصل الاجتماعي".
واستطرد: "الناس بقي اللي بتصطاد في الميه العكرة وكده بقولوهم بلاش تركيز معايا شوية علشان الارزاق بيد الله، وأتمني من كل قلبي وهفضل أتمني أن الأهلي يكسب الدوري ولكن هعيد نفس الجملة أن لو الأهلي مكسبش مفيش مشكلة عندنا من درع الدوري ده 37 درع يعني مش مهم اوي زي مالناس متخيلة".