تتجوزوا من غير شبكة.. بدبلتين يعنى؟

«إحنا بنشترى راجل» أول جملة بيقولها أبو العروسة للشاب اللى جاى يتقدم لبنته وبعد كده الشاب يتفاجئ بكم الطلبات اللى بتفوق إمكانياته كشاب في بداية حياته والحاجات دى بيبقى محتاج سنين وسنين عشان يمتلكها.. عشان كده قرر بعض الشباب المطالبة بتخفيض طلبات الزواج والاكتفاء في البداية بدبلتين ومحبس ولما سألنا الشباب هل ممكن يتقدموا لبنت ويقولوا لأهلها مش معايا غير دلبتين ومحبس كانت دى إجاباتهم؟
محمد فرحات بيقول «لو إمكانياتى ماتسمحش بأكتر من كده هاتقدم مافيش مشكلة، ولو أهلها رفضوا دى مشكلتهم مش مشكلتي، وعلى فكرة في حد من إخواتى اتجوز بالحاجات البسيطة دى مش أزمة يعنى، ومش ثقافة مجمتع زى ما بيحاولو يصدروها، اللى عايز يعمل كده هيعمل كده واللى عايز يعقدها برضه هيعقدها».
وإبراهيم عبدالفتاح كان رافض فكرة الجواز التقليدى وقال «لا مش هاتقدم لواحدة بدبلتين ومحبس حتى لو بحبها، لازم أكون عملت حاجة توقفنى على رجلى الأول عشان مابقاش في عين أهلها أنى صغير أو فقير، لازم أبقى ملو هدومى كده، بس بردو أنا ضد فكرة الجواز التقليدى اللى بيهتم بالجانب المادى بدرجة كبير، كأنى رايح اشترى مش اتجوز».
أما أحمد حسين فكان ضد الفكرة تمام «أكيد مش هينفع أتقدم لواحدة بدبلتين كده والسلام، لازم يبقى عندى حاجات تخلينى أقدر ابنى حياة واشيل مسئولية أسرة، فلازم أكون مستعد ماديا كويس، وإلا هيبقى في ضغوط تفوق طاقة الواحد وكمان بصراحة الواحد قدامه منظر الناس والمقارنات اللى بتحصل في العائلات، مش عايز احرج البنت قدام عيلتها أو أقاريبها حتى لو هي بتحبنى وموافقة عليا بظروفى المنيلة دى».
ولما سألنا البنات تقبلى تتجوزى واحد متقدملك بدبلتين، لورا النرس شايفة الموضوع من رؤية تانية وقالت «شرطى الوحيد للحكم في الموضوع ده أنى لازم أكون عارفاه بقالى كتير فالبتالى هبقى عارفة مستواه المادى فلو هو مقتدر وبخلان عليا مش هقبل، ولكن لو ظروفة المادية ماتسمحش باكتر من كده هقبل طبعا.. بس بشرط الحب.. بالحب ممكن أغير وجهة نظرى ووجهة نظر أهلي والمجمتع كله كمان.. زى ما بيقولوا الحب بيصنع المعجزات».
أما مريم نصر بتشترط «أنا ممكن أقبل بكده بس لو عارفة إن هو طموح وشغال بكل طاقته فهصبر عليه لأنه بعد كده هيقدر يفتح بيت طول ما هو بيحاول لبكرة، إنما لو كسلان وبيدور على واحدة رخيصة وخلاص فأكيد ده مش أنا، يدور على واحدة غيرى إنما لو شارينى مرة فلازم أكون شرياه ميت ألف مليون ميت مرة».
من النسخة الورقية