«شيتوس» يرد على تعليق أحمد عيد.. ويفسر سر هجومه على الزمالك

بعد الحملة الشرسة التي تعرض لها وائل رياض "شيتوس"، نجم المنتخب الوطني والأهلى السابق، بسبب ما كتبه على صفحته الشخصية بموقع التواصل الاجتماعي "فيسبوك": "النهاردة فسيخ وملوحة وبكرة هتعملها سموحة"، نشر على صفحته تفسيرًا لما كتبه.
وكان أحمد عيد عبد الملك، لاعب الزمالك، هاجم "شيتوس"، عقب فوز الأبيض على سموحة، أمس، وقال عبر صفحته ب"فيسبوك": "هتاكل فسيخ هتاكل ملوحة شيتوس اتروق هو وسموحة".
وجاء تفسير وائل رياض للأمر كالتالي:
"بصوا يا جماعة علشان أنا شايف لغط كتير جدًا من امبارح وكلام كتير عن البوست اللي أنا كتبته:
1- البوست أنا شايفه عادي جدًا مفيهوش أي تريقة على حد سواء نادي الزمالك أو إدارته أو لاعبته أو جماهيره، لكن هي جت بظروف احتفالات شم النسيم وأكل الفسيخ وكده يعني القافية طلبت.
2- أنا اسمي وائل رياض اللي كان بيلعب في الأهلي فعادي جدًا ومنطقي إني أبقي عايز الزمالك يتعطل والأهلي يحاول يلحقه.
3- موضوع الحيادية اللي الناس بتتكلم عليها دي على الشاشة فقط، يعني أنا على الشاشة ملك كل الناس بمختلف انتمائتها، وكمان دي مش صفحة البرنامج دي صفحتي الشخصية، يعني من حقي أقول آرائي الشخصية ووجهات نظري طالما أني مش بسيئ لحد.
4- موضوع إني حراق وإني بعمل كده والهيافة دي ماليش فيها علشان دماغي وتفكيري أكبر من كده.
5- ناس كتير زملكاوية كلمتني بكل أدب واحترام وتفهموا وجهة نظري، وناس تانية شتمت وقلة أدبها وكل واحد بيعبر عن بيئته.
6- أحمد عيد صديق وعشرة وموضوع البوست اللي كتبه يسأل هو عنه، لكن أنا مش من عادتي أعلق على أصدقائي على صفحات التواصل الاجتماعي.
7- الناس بقى اللي بتصطاد في الميه العكرة وكده بقولوهم بلاش تركيز معايا شوية علشان الأرزاق بيد الله.
8- أتمنى من كل قلبي وهفضل أتمنى أن الأهلي يكسب الدوري، ولكن هعيد نفس الجملة، أن لو الأهلي مكسبش مفيش مشكلة عندنا من درع الدوري ده 37 درع يعني مش مهم أوي زي ما الناس متخيلة.