مصالحة يا أكسلانس

المواطن الغلبان حسن حصاوى يغشي عليه من حين لأخر.وعندما يفيق لا يفهم ما حدث حوله من تغيرات ولكن أحيانا ما يجعل من يسمعه هو الذي يغشي عليه.
( حصاوى جالس بالمقهى يقرأ الجريدة ويضرب كفا بكف)
حصاوى
أنا مش فاهم حاجة.
زياد
( يلتفت له ) أسألني وأنا أجاوبك.
حصاوى
حضرتك بتفهم في السياسة ؟
زياد
أيوه أنا الدكتور زياد ومتخصص في الاقتصاد وأبويا كان محلل سياسي.
أسألني إيه اللي محيرك.
حصاوى
أنا قعدت 47 يوم هتجنن والإخوان محتلين رابعة العدوية وأنا مستغرب الحكومة مش تفضها ليه؟ بعتت تشتري سلاح؟ ولا بعتت الشرطة بعثات تتدرب بره؟.
زياد
( مبتسما ) أبدا. دي سياسة عشان يوقعوهم في الغلط أكتر.
حصاوى
وهما غلطوا فعلا وعملوا اعتصام النهضة وبرضه الحكومة فضلت ساكتة وهما ما سكتوش وكانوا بيحضروا لأعتصام تالث.
زياد
كويس يعني الحكومة كشفتهم قدام الشعب.
حصاوى
أشق هدومي؟ دا الشعب هو اللي طلب طرد الأخوان.
زياد
بس كان لازم نسيبهم شوية عشان نفضحهم قدام العالم
حصاوى
أكتر من كده؟ دول كان بيقتلوا وبيضربوا وبيخزنوا سلاح وكل شويه عددهم بيكتر وبقي البلطجية والبياعين والشحاتين والسياح واخدين رابعة مزار وقناة الجزيرة فاتحة أستوديو عندهم.
زياد
كان لازم ناخد وقتنا هنقنع العالم لما يبقي عندنا صور لكل اللي عملوه
حصاوى
دا العالم هو اللي فضحنا بالكذب وقال أنهم اللي معتدي عليهم. مع أنهم كانوا
فاتحين في خيامهم شفخانه بيعذبوا فيها وبيقطعوا صوابع ورقاب.
زياد
لكن بذمتك النهاية في الآخر كانت إيه ؟
حصاوى
كانت قتلي ومصابين قد كده في الشرطة والناس. والغرب برضه ما اقتنعش أنهم مجرمين ووقف معاهم.
زياد
لو كنا هجمنا عليهم من الأول كانت الضحايا خدوا عنا فكرة أوحش.
حصاوى
أنت هتنزفزني وتخليني أشتم وأسب ليه ؟ ما عنهم ما خدوا فكرة كويسه.
زياد
ما تبقاش متهور. كان لازم ندي فرصة لحل الأمر سلميا!؟
حصاوى
هو دول بتوع سلم؟
زياد
يا أخي نجرب يمكن نعقلهم أو ربنا يهديهم.
حصاوى
أحنا لسه هنجربهم؟ هما كان عمرهم قالوا حاجة وصدقوا فيها ؟
زياد
لكن ممكن يفهموا ويصدقوا بعد كده.
حصاوى
ولما يحتلوا البلد ويخربوها حته ..حته؟.
زياد
( ضاحكا ) مش للدرجة دي. دي مصر كبيرة قوي.
حصاوى
آه ما هو عشان كده طمعانين يدوا سينا لحماس ولتنظيم القاعدة.
زياد
خلي بالك أننا ما يصحش نقصي أي فصيل.يعني هنرجع نتعامل معاهم لما نعمل مجلس شعب.يبقي لازم نتعلم نتحاور بسلمية.
حصاوى
( بعصبية ) لا بقي ما تزودهاش وتقولي لي سلمية. طظ في الأجانب بتوعك.
زياد
ليه الشرشحة دي ؟
حصاوى
أتعامل معاهم أنت.يعني أي واحد يقول أنه سلمي نقوله أتفضل ألزقنا علي قفانا ؟ دول طول الوقت بيهددونا والتهديد بداية أي إرهاب.
زياد
لكن ممكن يفهموا ويصدقوا بعد كده.
حصاوى
يا عم دول مع أعداءنا وفيهم ناس خونة وموالسين مع أمريكا وتركيا وحماس وقطر.
زياد
عندك دليل؟ ثم أنا عندي أمل بعد اللي حصل بقية الأحزاب الدينية زى السلفيين والجهاديين تاخد درس وتعقل.
حصاوى
هو إحنا لسه هنسمح بأحزاب دينية ؟
زياد
طبعا. ما هي دي الديموقراطية يا أكسلانس.ولا بد من المصالحة
حصاوى
مصالحة في عنييك راجل ما تختشيش.
زياد
بص أنت بلدي قوي والظاهر المناقشة معاك غير مجدية؟
حصاوى
شرشحة سلمية يا خويا.
زياد
نو ..دي مش سلمية
حصاوي
أنت بتفكرني بواحد كان في تشكيل الحكومة وفضل معطل فض الاعتصام والآخر استقال وريحنا. أنت تقرب له ؟
زياد
أيوه. بتسأل ليه؟
حصاوى
يا جرسون. سكري بقي ربعمية وريقي نشف هات لي كوباية ميه بسرعة
الجرسون
سلامتك. أتفضل.
حصاوي
( يسكب الماء علي زياد بسعادة )
زياد
إيه دا؟
حصاوى
دي اعتراض سلمي .وبعدين نبقي نعمل مصالحة ( للجرسون وهو ينهض) الميه دي علي حسابي يا متولي.
( بينما يغشي علي زياد)