الست كريمة مختار تعظ : اتنين أنصفوا المرأة ..الإسلام وسوزان

حينما تتحدث الست كريمة مختار ، على الجميع أن يصمت ويسمع ويعي .. وسكووووووت .. اتفضلي يا ست ، هاتي اللي عندك .. قالت ماما كريمة: "الحق يتقال وبلاش زعل أو ندخل السياسة في الكلام اللي هقوله" .. خلّصي يا ست قولي .. بِالرّاحة عليّ يابني شوية ، اللي هيتقال مش طالب سلق .. خُشي ست كريمة ف الموضوع و سوي كلامك على نار هادية .. أقولك ، لو محتاجة شوية فحم لزوم الشوي، غالي والطلب رخيص بس خلصينا .. هِه .. عاوز تقولي إيه يا ماما نونة ؟ .. هُما كلمتين على رأي الأستاذ الراحل فؤاد المهندس :"الست سوزان مبارك ست كُمل" .. وحد اعترض ياحاجة .. يييه يابني اسمع للآخر هي مش طالبة مناهدة .. سامع .. 30 سنة والست سوزان فريح جوزها ف الحكم كان هوّ في وادي وهيّ في وادي تاني خالص .. كان كل همها العمل الخيري والنسائي والذي منه .. كانت عاوزة يا نظري تشوف الست في مصر أحلى ست ف الدنيا .. التاريخ هيسجل لها ده .. ما تبصليش كده ياواد .. هقولها خبط لزق :" حتى لو فيها عِبر الدنيا كلها ، سوزان انصفتنا" .. إدتنا كتير .. إدتنا حنان و بلالين وطوفي في عيد الأم .. حمت حقوقنا .. سوّت قوانين ياما على مقاس الست في مصر .. خَلت صوتنا فوق فوق .. عملتلنا مجلس أومي .. واهتمت جنابها بنوادي السيدات والستات والهوانم ، الخلاصة وبلاش حزقة وانفعال : " اتنين كرموا الست : " الإسلام وسوزان " واقفل الصفحة بلا وجع دماغ .