هل هلالك

فؤاد قاعود
بتهل دايماً يا رمضان.. بنعم ألوان
وكل ما يهوي الإنسان.. جو الدكاكين
دي مشمشية وبندق عال.. واردف شوال
وتين لذيذ ملضوم بحبال.. ونا أحب التين
لكن السعر كبير.. علي أجر وزير
وتعمل إيه لو كنت فقير.. ومن الخايبين
لا لك عمارة ولا تجارة.. ولا خمارة
ولا قريب جوا وزارة.. صارم الفالحين
وانا اللي ساير علي جمري.. ساتر أمري
في سلوكي دايما وما عمري.. لخبطت عجين
بلاقي نفسي في شهر الصوم.. بدفع بالكوم
مصاريف وبرضه ف آخر اليوم.. حاجتين ناقصين
لكن مهما أكون معاييش طبعا ما تجيش
أخلي بيتنا مافيهش ياميش.. ولا قمر الدين
اوزن لنا حمل من الجوز.. واتنين من اللوز
وكل شيء خليه محجوز.. ليوم الاتنين
ولو فتح ربي عليا.. تبقي هنية
يا أجيلك السنة الجاية.. ألقي الشيلتين