اتحاد الجمباز هيجنن صقر .. وهنعمل فيه اللي عمله فينا

بعد عودة عمرو السعيد رسمياً لرئاسة اتحاد الجمباز الأسبوع الماضي، "وتحديداً يوم السبت 2 أبريل" رفض محمود أحمد علي رئيس اللجنة الأوليمبية المصرية إخطار الاتحاد الدولي للجمباز بقرار عودته لرئاسة الاتحاد مرة أخري، وهو ما أدهش الجميع، خاصة أن ذلك يضر بمصلحة اللعبة التي تنتظر بطولات مهمة مؤهلة لأوليمبياد لندن 2012، فتحدثنا معه وكان هذا الحوار الساخن. في البداية ما رأيك في رد اللجنة الأوليمبية بأن إخطار الاتحاد الدولي للعبة بعودتك ليس من اختصاصها ؟.
مش عارف أقول إيه حاجة غريبة جداً لأنها قبل كده كانت تبلغ الاتحاد الدولي بأي شئ ، وبعدين أنا رجعت بحكم قضائي علاوة علي خطاب من المجلس القومي يؤكد ذلك .. اعمل ايه اكتر من كده.
وماذا ستفعل في حال استمرار رفضها ؟.
باعتباري الرئيس الشرعي سأقوم بإرسال قائمة لاعبي المنتخب للاتحاد الدولي للعبة حتي لا تتعلق مشاركة مصر في بطولة العالم بطوكيو أكتوبر المقبل.
لماذا قررت عودة المدرب الصيني "هوو" لتولي تدريب المنتخب بدلاً من خالد عويس ؟.
في البداية أحب أن أؤكد علي أن خالد عويس أحسن مدرب في مصر، ولكن هذه المرحلة تحتاج إلي مدير فني أجنبي لرفع مستوي اللاعبين، وخليت معاه 3 مدربين مصريين مساعدين له علشان يتعلموا ويستفيدوا منه، وعلي فكرة مرتبه 2500 دولار.
ما السبب في رغبتك بتخفيض راتب المدربة الروسية للجمباز الإيقاعي؟
لأنه مش معقول أقبل مدربة اتعرضت عليا قبل كده ب 2000 دولار بس، وأوافق عليها دلوقتي ب 5600 دولار شهرياً "ده يبقي حرام"، وعلي فكرة مجلس غانم مرسي انضحك عليه أو كان بياخد عمولة منها .. الله أعلم.
في حالة عودة وزارة الشباب والرياضة .. من ترشحه لهذا المنصب ؟.
اثنين من وجهة نظري .. الأول خالد حمودة عميد كلية التربية الرياضية بالإسكندرية، والثاني خالد عبد العزيز لما يملكه من خبرة طويلة في المجال الرياضي، والدليل علي ذلك إشادة الدول بحُسن التنظيم في بطولة أفريقيا لكرة القدم عام 2006 بمصر.
كيف تري التعامل بينك وبين حسن صقر خلال الفترة المقبلة ؟.
المشكلة بالنسبة له إنه هيتعامل معايا "غصب عنه" لأننا مقبلون علي دورة الألعاب الأفريقية في موزمبيق سبتمبر المقبل ودورة الألعاب العربية بقطر في ديسمبر المقبل، والجمباز لعبة مضمونة بالنسبة له لتحقيق ميداليات ذهبية "ده لو عايز ينجح"، وهاخد فلوس كويسة منه .. وبعدين بيني وبينكم عندي بعض اللاعبات أمهاتهم علي علاقة طيبة بالدكتور عصام شرف رئيس مجلس الوزراء فكل شوية يلاقي خطاب منه بضرورة الاهتمام باللعبة وده مش هيحصل إلا عن طريق الاتحاد "اللي بيحبه موت ".. علشان كده هيتجنن مني، وبإذن الله هنعمل فيه اللي عمله فينا والبداية كانت يوم السبت الماضي بتأجيل النظر في الطعن المُقدم منه في الحكم الصادر لصالحي إلي جلسة 14 مايو المقبل لتقديم المذكرات ولسه التأجيل التاني بتاع الحكم .. واحنا اللي عملنا كده لعدم استيفاء الأوراق المطلوبة منه "المزورة أصلاً" والبقية تأتي .. لأن من عمل يُعمل ولو بعد حين.