گل ما تهل البشاير

كل ما تهل البشاير
من يناير كل عام
يدخل النور الزنازن
يطرد الخوف والطلام
يانسيم السجن ميل
عالعتب وارمي السلام
زهر النوار
وعشش في الزنازين الحمام
من سكون السجن صوتية
نبض قلبي من تابوتي
بيقولوا لك ياحبيبتي
كلمتي من بطن حوتي
سلميلي عالحبايب
ياحبيتي
سلميلي
كل حب وله نصيبه من سلامي
بلغيله
احضني العالم عشاني بين عيونك
وابعتيلي نظره
منها أشوف حبايبي واشفي قلبي
واساليلي كل عام في بلدنا
كل برج وكل مادنه
كل صاحب من صحابنا
كل عيل من ولادنا
حد منهم شاف علامة من علامات القيامة
قبل ما تهل البشاير يوم 18 يناير
لما قامت مصر قومه بعدما كانت في نومه
تلعن الجوع والمذلة والمظالم والحكومة
سلميلي عالولاد السمر خضر العمر
في عموم الحواري
سلميلي عالبنات المخطوبين في المهد لسرير الجواري
واساليلي بالعتاب كل قارئ في الكتاب
حد فيهم كان يصدق بعد جهل وبعد نوم
أن حس الشعب يسبق أي فكر وأي صوت
هي دي مصر العظيمة
ياحبيتي هي مصر
اللي فضلت في هواها عشنا
علي الف قصر
هي دي ياعزة مصر
هي دي ياعزة مصر.