سهير البدراوي: »مستعدة اشتغل للأطفال ببلاش«

كلنا نتذكر مدام نفيخة في كرتون »سبونج بوب»‬ لكن لا أحد يعرف شخصيتها الحقيقية، هي ممثلة ومدبلجة شاركت في دبلجة العديد من شخصيات أفلام الرسوم كما شاركت في مسلسل »‬بكار»، والعديد من الأدوار الكرتونية الأخري.
هي سهير البدراوي عاشقة الأطفال التي قالت لنا: »‬هفضل اشتغل في أي حاجة للأطفال حتي لو مش هاخد ولا مليم».
• متي بدأت العمل في الكرتون والدوبلاج؟
منذ الطفولة بدأت اشتغل في التليفزيون وللأطفال، قبل المدرسة، وبعدها بدأت العمل مع ماما سميحة وأبلة فضيلة، وبعد أبلة فضيلة التقيت بالأستاذ عبدالرحمن أبو زهرة، سمعني مرة وقال: »‬أنت خسارة لازم تروحي لديزني»، بدأت مع الدكتورة مني أبو النصر، وعملنا السندباد، وعملنا بكار ونال جوائز عديدة، وبعد ذلك حولنا فيلم بكار لمسلسل، وبعد كدا ربنا وفقنا وعملت مسلسلات دينية مع يحيي الفخراني ومع ديزني، وعملت أحدب نوتردام والجميلة والوحش وماما نفيخة في سبونچ بوب .
من الذي رشحك وشجعك علي موهبتك في الدوبلاج؟
أمي الله يرحمها، كانت مخرجة في التليفزيون في البرامج التي تخص المرأة وكانت تأخذني أنا وأخواتي الأربعه معاها، أنا استمريت لكن أختي سهام فضلت تكمل في كليه الطب، أنا إللي مقدرتش أطلع من كارير أمي، لأني كنت بحب الميكرفون جدا من وأنا طفلة كانوا بيسألوني تشتغلي إيه، أقولهم مضيفة أو مذيعة، والحمدلله دخلت الإذاعة وأصبحت مذيعة ومقدمة برامج، وبعدها بدأت أشتغل في الدوبلاچ.
هل هناك حلقات جديدة من بكار؟
آه في حلقات جديدة فعلا، بس نلاقي الفلوس يا أختي (بمزحة جميلة).
هل ستبقين في التليفزيون؟
اللي بيدلعوا يطلعوا برا التليفزيون، إللي عايزين يشتغلوا ينوروا، (احنا هنشتغل حتي لو بتعريفة) إحنا اشتغلنا بعد 67 وكنا بناخد 29 قرشا يعني تعتبر أجورنا بنتبرع بيها للمجهود الحربي، إحنا دلوقتي في حرب مع إعادة ماسبيرو، مش هنخلي القنوات الفضائية الأخري تنتصر علينا.
ما أعمالك الجديدة في الفترة الحالية؟
إحنا بندبلج فيلم الأميرة النائمة بتاع أنجيلينا جولي في الوقت الحالي.
عندما قدمت بكار ورشيدة كنت في سن صغيرة هل كنت تتوقعين نجاحه؟
بصراحة آه، لأن دكتورة مني كانت لا تبخل عليه بأي شيء، كانت بتعمل إعلانات ويجي أطفال وتمتحنهم، هي إنسانة جميلة ومجتهدة وأنا بعشقها، وإنسانة فنانة، وحاربوها كتير بس انتصرت في الآخر.
هل قمت بأي عمل آخر غير الدوبلاج؟
آه، اشتغلت كتير للأطفال في صوت القاهرة كمسلسل حكاية ثورة مع وليد عبدالعال، والسيدة نفيسة مع لبيب مصطفي، وقلب الخطر مع عبدالمنعم صادق، واشتغلت وأنا طفلة مسرح مع عزت العلايلي، والتليفزيون علي القناة الأولي، وبرنامج دنيا العلم والثقافة.
ما الدور الذي شعرت أنه محبب لقلبك وأنت تقدمينه؟
كل حاجة اشتغلتها أحببتها، يعني مثلا مولان أنا كنت طالعة ماماتها الإنسانة الحنينة الرقيقة والأم اللي بتقف مع بنتها ومولان اللي بتكافح، واللي بتقول مفيش فرق بين الراجل والبنت، والأقرب اللي قلبي حلقة حسونة عن أزمة المياه، من غير ما كنا نعرف إن ممكن يبقي في أزمة مياه في المستقبل بعد كدا، وحلقة الأكل اللي من الشارع، والمذاكرة.
ما أنجح مسلسلات الدوبلاج؟
بكار، ونساء في القرآن، وسبونج بوب مسمع أوي مع الأولاد، وميكي ماوس طبعا، والجميلة والوحش، والآيس إدج، وتوي أستوري، ومدام بطاطس، وغيره كتير أكيد.