كلهم قالوا إن لطفي لبيب اعتزل الفن بسبب مرضه، إلا شخصا واحدا موثوقا فيه جداً هو لطفي لبيب نفسه.. المقاتل الذي كان ضمن أول كتيبة عبرت قناة السويس في حرب أكتوبر، التمثيل هو سلاحه الذي يدافع به عن حقه في المحبة، وامتلاك قلوب ملايين المشاهدين، ورسم الابتسامة علي وجوه الصغار والكبار.. وجه لطفي لبيب باسوورد ضحكة المصريين، والعلامة المسجلة للتفاؤل، يجلس منذ عامين في منزله، بعد أن أصيب بجلطة في المخ تركت أثراً علي ذراعه وساقه، يتماثل للشفاء يوماً بعد آخر داخل مربع البهجة، زوجة مخلصة تملأ قلبه، وثلاث بنات يشغلن حياته. لطفي لبيب قرر أن يطمئن جمهوره من »آخر ساعة» ويشكرهم علي طوفان المحبة، ويحكي لهم عن الفن والكتابة والوطن، ويعدهم بالعودة قريباً، وإلي نص الحوار.. الناس مخضوضة عليك؟ والله ده كتير عليا أوي إنت كويس؟ كويس الحمد لله وبخير وفي نعمة كبيرة إيه اللي حصل؟ جاتلي جلطة في المخ.. ماعرفش المخ ده جالي منين.. سابت أثر في إيدي ورجلي.. بس بيروح بالعلاج الطبيعي.. بقيت مانيوال!.. الحمد لله راضي جدا بقسمة ربنا وسعيد.. أول مرة أقعد في بيتي من سنين طويلة. أومال إيه حكاية اعتزالك الفن المنتشرة في كل حتة؟ الفن لا يمكن اعتزاله بأي شكل من الأشكال.. فكرت في المسألة.. وبعد كده قلت طيب ما أنا أقعد في بيتي من غير ما أعلن وأعمل ضجة وشوشرة.. يعني اعتزلت ولا ما اعتزلتش؟ أنا قاعد في بيتي بقالي سنتين عاوزين تسموها اعتزال ماشي عاوزين تسموها استراحة محارب انتوا أحرار.. عاوزين تقولوا عود علي بدء مافيش مانع.. كل الحكاية بدل ما كانوا 18 ساعة شغل في اليوم أصبحوا 4 أو 5 بس. 18 ساعة بحالهم تصوير؟ ماكونتش بقعد في بيتي، رصيدي فوق ال 120 فيلم، وأكثر من 150 مسلسل، و24 مسرحية. ولما قعدت في البيت إيه اللي حصل؟ بقيت أشوف ولادي وألعب مع أحفادي. أول مرة مثلت كانت إمتي؟ في مسرحية من إخراج الراحل عادل منير المونتير المعروف في قرية اسمها ببا ببني سويف، كانت عن حرب 1956. قدمت فيها دور إيه؟ العمل كان بيحكي عن حياة أسرة مكونة من أب وأم وطفل وكنت أنا الطفل الوحيد في المسرحية. ولما كبرت دخلت معهد فنون مسرحية؟ لأ.. كلية زراعة.. قضيت فيها سنتين وسبتها مكملتش.. بعدها دخلت معهد فنون مسرحية، واتخرجت ودخلت الجيش، وفضلت فيه 6 سنين ونص.. عسكري ماخدتش أي ترقية؟ أومباشا درست حاجة تاني غير المعهد؟ آداب قسم فلسفة واجتماع أثناء فترة الجيش. الفلسفة هي اللي خلتك تدمن القراءة والكتابة؟ أنا بعشق الكتابة والقراءة، ورأيي إن الممثل مبدع ثاني والكاتب مبدع أول ودائما أطمح أن أكون من الأوائل. في فترة حكم الإخوان كنت بتكتب مقال في جريدة مستقلة.. ليه توقفت؟ الصحافة مالهاش شريك، واللي بيشتغلها ماينفعش يشتغل شغلانة تانية، وكذلك التمثيل فكان عليَّ أن أختار بينهم، فاخترت التمثيل. بس المقال كان صغير؟ المقال بشكل يومي متعب وصعب.. يحتاج للبحث عن التيمة التي ستكتب عنها ثم مواكبة الأحداث.. أذكر أني سافرت أمريكا في هذه الفترة وكنت أكتب من هناك، لكن سرعة الأحداث في مصر كانت تجبرنا علي الكتابة بشكل يومي.. كل يوم أحداث جديدة. دي كانت أول مرة تكتب فيها للصحافة؟ كتبت قبلها مقال بعنوان »يوميات نصاب».. كوميديا سياسية في جريدة تابعة لحزب التجمع بالإسكندرية مع جلال عامر. ليه أطلقت علي كتابك »الكتيبة 26»؟ دي كتيبتي في حرب أكتوبر، أول كتيبة عبرت القناة، كتبت عن النمل بتاع الجيش (الجنود)، وللأسف لم يتم تصويره، فقمت بطباعته كوثيقة موجودة وشاهد عيان علي هذه اللحظة، وأمنيتي يتحول لفيلم. كتبته إمتي؟ بعد الحرب مباشرة خد منك وقت كتير؟ سنة كاملة.. أحداث الحرب للي شافها زيي مسمار قلاووظ سهل تدخل دماغك، إنما لما تحاول تتذكرها وتنتزعها بتكون مؤلمة للغاية. بدأت التمثيل بعد خروجك من الجيش مباشرة؟ تحديداً مع اغتيال الرئيس السادات. أومال كنت بتعمل إيه بعد الجيش؟ سافرت دبي أكون نفسي.. عشت هناك 3 سنين و8 شهور فبدأت متأخرا عن زملائي 10 سنوات. فترة الجيش علمتك إيه؟ خلتني مقاتل علي طول ده اللي خلاك تقفز علي كل زملائك وسبقتهم؟ إطلاقا.. كلهم مبدعون.. كل الحكاية توفيق من ربنا فقط. بيقولوا عليك إنك تميمة حظ لكل اللي بتشتغل معاه؟ لا أحب أن أوصف بهذه الصفة فلدي إمكانيات ممثل وتميمة الحظ تطفئ إمكانيات أي فنان. بس إنت حرامي بتخطف الكاميرا من زمايلك؟ لست إلا ممثل بحب أمثل كتير علشان كده دائما ألعب في خط الوسط وليه مش بطولة؟ خط الوسط بيمكنني من تجسيد كل الأدوار.. كل يوم شخصية مختلفة وده اللي حصل والمفروض أكون شبعت تمثيل هو التمثيل بيشبعوا منه؟ لأ.. مابشبعش منه. اختلف دور السنيد في السينما حاليا مابقاش صاحب البطل ممكن عمه أو جوز عمته أو أبوه؟ السينما كلها اختلفت.. بل إن الدراما نفسها اختلفت، فعلي سبيل المثال كانت المسلسلات قديما تقدم قيمة مثل »لن أعيش في جلباب أبي» و»رأفت الهجان» و»أبو العلا البشري» و»أبنائي الأعزاء شكرا» و»الشهد والدموع» و»أهالينا».. إنما التليفزيون حاليا بيقدم عشوائيات وبلطجة ومخدرات ودعارة وسرقة آثار ورجال أعمال فاسدين وحالات نفسية وعصبية وكل هذا ليس له علاقة بالمجتمع. بس الفن مراية للمجتمع؟ كل ما يفعله هؤلاء إنهم يركزوا علي مشكلة صغيرة في المجتمع ويقوموا بتضخيمها، وأعتقد أن الإنتاج من خارج مصر فرض عليه أن يتم مشاهدتها بهذا الشكل، مصر عمرها ما كانت كده.. هذا لا يجوز. والحل؟ لا بديل عن إننا نتخندق في الأدب، ونعود للروايات مرة أخري. هل لديك أي اقتراحات لرواية تتحول لمسلسل؟ ملحمة »السراسوة» للكاتب أحمد صبري أبو الفتوح خمسة مجلدات تتحدث عن نشأة سرس الليان رواية رائعة.. تحتاج لسينارست عبقري يحولها لمسلسل. إيه الدور اللي لسا مالعبتوش ونفسك تمثله؟ كتير أوي! ينفع تعيد دور فنان من الزمن الجميل مثله قبل كده؟ زي إيه؟ العمدة في فيلم »الزوجة الثانية» لايق عليك؟ ممكن جداً وهتقدمه بشكل درامي ولا كوميدي؟ سأضفي عليه بعضا من شخصيتي، فأكيد سيضحك المشاهدين.. الفن متعة لابد وأن تصل للناس ولازم يستمتعوا ولو بضحكة. إنت شايف إننا بنعاني من أزمة في الفن حاليا؟ بالطبع!.. هناك أزمة شديدة، رغم الزخم الدرامي، إلا أنه لا يؤثر علي المجتمع ويوصله لحالة الإشباع. هل مصر لا تزال محتفظة بمكانتها الفنية؟ مصر حباها الله بفنانين وأدباء لأنها بلد قديم.. وتحتكر سوق الفن بين كل الناطقين بالضاد حتي الآن، والدراما كفيلة بأن تكون مصدراً من مصادر الدخل مثل السياحة وقناة السويس. عسل أسود كان فارق مع الناس وقدم قيمة حقيقية.. وأنت لعبت فيه دور حلو جداً؟ هناك واقعة يجب أن أحكيها للأمانة، لم أكن المرشح الأول للفيلم كان الدور لزميلي محمد شرف، الله يرحمه، وأرسلوا لي لأقوم بالدور بعد إصابته ودخوله المستشفي للعلاج، وقبل أن أوافق علي تقديم الشخصية تأكدت من رضاه الكامل عن ذلك، وقال لي »إعمل يا لطفي الدور» وكنت بمثل علي الهوا يعني أقرأ المشهد وأمثله علي طول. كنت حاسس إن الفيلم هيحقق النجاح ده كله؟ نعم. اشمعنا؟ لأننا طول الوقت بنشوف نفسنا واحنا جوه البلد.. وكان لازم نشوف حد مننا يبصلنا من بره وبالنسبة لديفيد كوهين في »السفارة في العمارة»؟ ليس لي في هذا الفيلم سوي 5 مشاهد فقط لكن أهميتهم كانت كبيرة جدا، فشكل المكان الجغرافي للسفارة التي تقع بجوار شقة عادل إمام يشابه وقوع إسرائيل بجانب مصر، فالناس اتفرجت علي الفيلم بنهم نظرا لحجم اهتمامهم بالقضية الفلسطينية وهو ما زاد من عمق السفير الإسرائيلي. ملامح الشخصية اليهودية كانت مختلفة عن اللي بنشوفها دايما.. ليه؟ تجنبت ما هو سائد عن اليهود من خنفان الأنف وإنحناءة الظهر والخبث المعلن، فكنت إنسان طبيعي لأبعد الحدود.. والمهم أن نراهم بشكل صحيح. هل عادل إمام هو من اختارك للدور؟ نعم.. اتصل بي وقال لي أنا مش بكلم ممثل إلا اللي بكون عاوزه.. وأنا عاوزك للدور ده، وكان الاختيار بالتشاور مع عمرو عرفة. هل ساعدك في أداء الدور؟ بالطبع.. قال لي خليك طبيعي خالص.. وهو اللي قاللي خد التورتة وأنت خارج. بعض المثقفين هاجموا الفيلم قبل عرضه واتهموه بأنه نوع من التطبيع؟ حكم مسبق علي فيلم لم يُري.. وتمت دعوتي من السفارة الإسرائيلية آنذاك وبالطبع اعتذرت لهم. »بعد فيلم السفارة في العمارة» أصبحنا نشاهد لطفي لبيب تقريباً في كل الأعمال؟ آه.. بقيت عامل زي السؤال الإجباري ومثلت كل الأدوار. أكل عيش ولا فن؟ الاتنين.. في الفترة الأولي كان أكل عيش وحتي عام 2006 وبعد »السفارة في العمارة» بدأت أؤدي الأدوار اللي أحب تقديمها فقط. وإيه الأدوار اللي بتحبها؟ دوري في »واحد صفر» و»رشة جريئة» و»عسل أسود» و»طير انت» و»سيما علي بابا»، و»جاءنا البيان التالي» و»يانا ياخالتي» و»اللمبي» و»صايع بحر» و»كده رضا». لما فقدت شعرك.. فقدت دور الفتي الأول في السينما.. مش كده؟ آه طبعا.. طلعت في سن محير في الدراما فجأة لاقوا قدامهم شاب وأصلع فبدأت أستعجل كبر السن علشان يمشي مع الشكل وبدأت أعجز نفسي، طلعت في دور أبو إسعاد يونس في بداياتي. وليه ماستخدمتش الباروكة؟ مابحبهاش كيف يحكم زملاؤك علي أدائك الرائع هل يصابوا بحالة من الانبهار؟ لا ليه؟ لأنهم أيضا ممثلون جيدون جدا ولا نستطيع أن نختلف عليهم. لما تعمل مشهد بشكل مميز بيقولولك إيه؟ عادي بيقولوا كويس يالطفي. معقولة؟ ما هو لو جبنا أي حد منهم يعمل الدور هيعمله حلو أوي برضه.. بس كل واحد له مذاق. أنت ليه معندكش »الأنا» زي معظم الفنانين؟ أعوذ بالله من »أنا».. جنوحي للأدب جنبني مرض القرنية المقلوبة، وهو مرض يعاني منه معظم الفنانين حيث لا يري الواحد منهم سوي نفسه. مافكرتش تكتب سيناريو وتقوم بتمثيله؟ لأ ليه؟ ماعرفش.. اتعودت كممثل إني أدخل علي الورق وماتعودتش أكتب الشخصية اللي همثلها. فكرت تمثل للأطفال؟ أتمني.. نحن نريد تقديم فكر للصغار.. فلا يجب مخاطبة الطفل إلا بلغته البسيطة. ومن أنسب شخص يتواصل معهم؟ الجد.. فأنا كجد عندي 4 أحفاد بلعب معاهم كأني واحد منهم بالظبط. هل ترغب في استنساخ »أبو العلا البشري» بشكل يتلاءم مع الوقت الحالي؟ نفسي.. ياريت هل أنت راضي عن أعمالك؟ راضي لأقصي درجة ولو مفيش حاجة تانية برضه راضي جدا. مين دايما بيسأل عنك من الوسط الفني؟ كلهم. ومن الأقرب لك من الفنانين؟ صديقي الحقيقي والمقرب هو محسن حلمي مخرج المسرح. ومن زملائك؟ كلهم.. اللي سأل عليا واللي ماسألش.. ومش زعلان من حد مطلقا. هل اتصلت بك رئاسة الجمهورية للاطمئنان عليك؟ الرئاسة اتصلت.. وسألتني إذا كنت محتاج لأي شيء أو أرغب في الانتقال لتلقي العلاج في المستشفيات التابعة للقوات المسلحة.. وشكرتهم شكرا جزيلا. هل سنراك في أعمال رمضان المقبل؟ لأ هنشوفك أمتي علي الشاشة؟ في عيد الأضحي.. فيلم »خيال المآتة» مع أحمد حلمي. مين فتاة أحلامك وأنت مراهق؟ فتاة أحلامي هي نفس المرأة التي تزوجتها، وأنجبت منها 3 بنات كاتيا وكارمن وكريستين. ومن الممثلات؟ أمينة رزق ليه؟ علشان فضلت تمثل لغاية ما ماتت لم تتوقف لحظة. لو ماطلعتش ممثل كنت هتطلع ايه؟ برضه ممثل.. لو لم أكن ممثلا لوددت أن أكون ممثلا. هواياتك إيه؟ الكتابة الكتابة بتعمل انتفاخ للذات؟ بالعكس تماماً.. الكتابة تقلم أظافر الوحش داخل الإنسان. فكرت تكتب قصص قصيرة؟ كتبت كتير قصص قصيرة وبكتب مسلسلات نشرتها؟ مستني لما أجمعها.. كتبت أفلام قبل كده؟ فيلم روائي قصير واتصور اسمه »جنازة أم حسن» بيحكي عن إيه؟ قصة محسن حلمي لما والدته اتوفت وجاني ورمالي فلوس وقالي اتصرف انت.. وفجأة اختفي.. فلقيت أن عليا أجيب الكفن وأحجز المسجد والمقرئ وقاعة المناسبات وبقوم بكل اللي كان المفروض هو يعمله. إنت برج إيه؟ العقرب بس العقرب شكاك.. وصعب؟ أبدا.. مسالم جداً.. بيتقالي إني طيب القلب.. علي وجهي ملامح ذكاء »أفتقده». لمن تقرأ حاليا؟ لأديب جميل اسمه حمدي أبو جليل وهو مبدع بياخدك معاه في روايته وحكاياته.. وواحد تاني اسمه عمرو عاشور. ومن تفضل من الأدباء الكبار؟ سيد حجاب ونجم ويوسف القعيد. خططك إيه للمستقبل؟ زي ما أنا كده لأني في المستقبل بتاعي فعلاً.. تجاوزت الماضي والحاضر. مابتكتبش حاجة جديدة؟ بكتب مسلسل خلصت منه 18 حلقة.. يخاطب مصر.. قصته تاريخية تدور أحداثه حول فتاه أمريكية جاءت مصر عام 1910 اسمها »ليليان تراشر»، لتعمل مدرسة في المدرسة الأمريكية بأسيوط، وأسست أكبر ملجأ للأيتام في العالم، وقال عنها سلامة موسي أنها تعالج جرحي الحياة. وإيه الهدف من المسلسل؟ إبراز الخير حتي لو كان من ست أمريكية. هل مصر تؤثر علي من يأتي من الخارج ليعيش فيها؟ كل من يأتي إلي مصر تمصره شمسها.. والبني آدم مننا يا إما عصفورة أو شجرة وأنت مين فيهم؟ أنا شجرة ماينفعش أخرج من مصر بمناسبة التاريخ مين الشخصية التاريخية اللي نفسك تقدمها؟ شخصية مجنونة.. الحاكم بأمر الله ليه؟ محيرة. ومش معروف اتقتل ولا مات موتة ربنا ولا اختفي ولا تم وضعه في مستشفي المجاذيب. شايف البلد إزاي دلوقتي؟ أنا منحاز للسيسي جدا.. أهم 3 حكام في تاريخ مصر من وجهة نظري محمد علي والخديو إسماعيل وعبد الفتاح السيسي. أنا شايف بعيني محدش بيقولي.. كان عندنا انقطاع كهرباء 4 ساعات يومياً وبقينا مصدرين للكهرباء، والعاصمة الإدارية عالمية.. والمحاور الجديدة ومدينة العلمين وفي طريقنا للقضاء علي العشوائيات.. إحنا دولة كبيرة وتاريخنا كبير وحاولوا يقسمونا وماقدروش.. مصر كتلة واحدة صلبة جدا. شايف القاهرة هتبقي إزاي بعد الانتقال للعاصمة الإدارية؟ القاهرة مرت بثلاث مراحل بناءها الأول ثم تطويرها الثاني، وهو الذي يقوم به السيسي حاليا من توسعة لتصبح المدينة مهيأة للسياحة خاصة بعد نقل الوزارات والمؤسسات والهيئات والسفارات ومساكن السفراء للعاصمة الإدارية. لماذا لم تفكر في تقديم برنامج؟ مش عاوز أبقي مذيع.. أنا ممثل فقط، ودرجة ممثل راقية جدا وينبغي أن تكلل هذه الدرجة بالاحترام، وألا يكون الطموح هو الوصول لدرجة مذيع أو مقدم برامج كل هؤلاء بيتحركوا داخل حدث إنما الممثل حالة. علاقتك ايه بالسوشيال ميديا؟ أنا توقفت عند عصر الاتصالات.. بطلب من ولادي يسجلولي الأرقام. وليه ماتعملش صفحة علشان الناس تتابعك؟ يتابعوني من خلال أخباري.. هو أنا هبيع دماغي لجهاز! أنت فنان مثقف وواع؟ ربنا يخليكوا.. هكذا شبه لكم.
