حارة المبدعين

محمد جرجس الفرعوني

الساعة الثانية والشوارع مكتظة بالسيارات و الناس، الساعة الثانية بعد الظهر والأجساد لزجة بالعرق والسيارات مخنوقة بعادم السيارات، الساعة الثانية بعد الظهر في الصيف والشمس تلقي بقطع من سعير. واعترضت السيارات جثة في وسط الطريق. مغطاة بورق الصحف. والتصق الورق بالجثة بعد أن رشح بالدماء.. حادت السيارات عنها وأسرعت.. واندفع السائرون علي أقدامهم نحو أهدافهم.. يزورون عنها ويغطون جوانب وجوههم بأيديهم.. وبما في أيديهم من مجلات وصحف.. جذبت النساء أزواجهن من أذرعهم وأسرعن.. وأوسع الرجال من خطواتهم وهم يسرعون.. وتلاميذ المدارس جروا وراء بعضهم.. أغلقت المحال والمقاهي أبوابها.. وسرعان ما عرف القادمون إلي الشارع بالأمر فانحرفوا إلي شارع آخر.. والجثة مازالت في عرض الطريق..تضربها الشمس.. تمتص دماءها أوراق الجرائد.. حتي قل عدد العابرين.. وكاد تيار السيارات أن ينقطع.. وكل حين تمرق سيارة بجوارها فيعلو طرف الجريدة قليلا ويعود فيلتصق بها ثقيلا مشربا بالدماء.
بحث وكيل النيابة في جيوب القتيل فلم يعثر علي بطاقة تحقيق الشخصية.. فظل يستوقف كل عابر.. يأخذ بطاقته.. ثم يكشف له عن الجثة.. ويسأله إن كان يعرفها.
قال الشاهد الأول بعد أن دارت به الدنيا.. إنها جثة جميل حسن الطيب.. ويعمل طبيبا.. نظر وكيل النيابة في بطاقة الشاهد.. اسمه جميل حسن الطيب.. ويعمل طبيبا.. لم يصدقه وكيل النيابة لكنه احتجزه.
تهاوي الشاهد الثاني باكيا.. وقال إنها جثة عيسي محمد موسي.. ويعمل مهندسا.. اطلع وكيل النيابة علي بطاقته.. وجد اسمه عيسي محمد موسي.. ووظيفته مهندس.. صفعه بالقلم مغتاظا واحتجزه.
صاح الشاهد الثالث في جنون.. إنه محمد جرجس الفرعوني.. وظل يصرخ وهو يمد لوكيل النيابة ببطاقته.. قرأ وكيل النيابة فيها محمد جرجس الفرعوني.. مقاول.. واحتجزه ضائقا.
حجز وكيل النيابة عشرين شاهدا.. وقال لنفسه إنهم بلا شك مجانين.. قلب وكيل النيابة الجثة علي جانبيها.. وظل يبحث في جيوبها.. حتي عثر علي بطاقة تحقيق الشخصية في جيب داخلي.. تهلل وجهه وفتحها.. ولم تمض لحظات حتي سقط مغشيا عليه.
بلاش الدم
أنا مملكش غير أسفي
يأغلي عندي من نفسي
أنا شايف أنا ساكت
وحابس صوتي بين نفسي
في ناس بايعة وناس ضايعة
وناس ماشية مع الماشيين
وناس منهم وناس منا وناس ثايرة
وناس تانيين
أنا منهم أنا تايه مع التايهين
يدوب عارف أنا اسمي
بتوب العزة متغلف
أبص لصورتي ول رسمي
الاقي الرسم متولف
ملامح شيبة من الأحداث
ملامح طيبة وبتنداس
ملامح حلم بالأفضل
هلاوس رعب مالية الراس
ووسط الزحمة والأفلام
بشوف فيها هموم النيل
واشوف فيها بكا الأهرام
واشوف فيها صراخ وعويل
عيال م البرد شبعانة
وشوش ف الهم شقيانة
وأم بتبكي علي حالها
لحضن ولادها عطشانة
يمين يروي حنين الأم
يشيل العتمة ويا الهم
متيجوا.. نبني ونعمر
يمين الله... بلاش الدم
عزت أحمد علي - الزقازيق
شيزوفرينيا
تقرير:
غاويين يغنوا للنسيم ويدمعوا
فتهب حبات الهوا
تمسح دموعهم صُحبة بايتة
يرجعوا لعيون فراعنة ممسوحين ومفروكين
ماشيين خطاويهم ورا.
2 - أمر:
أقفل نبضك علي حبات المُر
اللي بتتجلي جوا عروقك
وسيب فدان الخُضرة ف عينك
يمكن يطرح دود بيبلبع
كل الشوف المش بيرد
3 - نتيجة:
أكيد ف يوم هتسيبك منك
وبالتالي هتسيبني منك
لكن مش عارفة
إزاي هترحل
واحنا واحد؟
منال الصناديقي - سوهاج
مش شرط
مش شرط كل غالي
يبقي عليه القيمة
ومش شرط كل أفكار أهالينا
غير صالحة وقديمة
مش شرط كل مكسب
تعتبره غنيمة
مش شرط
لما تحبط
تضربها صرمة قديمة
مش كل اللي تقبلهم
ناس طيبة ورحيمة
في ناس ساهية وداهية ولئيمة
ماعندهمش ريحة الدم
وم الإحساس
عديمة
مفيش حاجة
في الحظ
اسمها تميمة
مش شرط كل اللي
باصص لك بيسمعك
مش شرط كل ألم
هتسمع عنه
هيوجعك
مش شرط تكون الدمعة
بس هي اللي ترجعك
مش شرط كل اللي يشوف شغلك
يقول يا سلام ويشجعك
ومش شرط كل نظرة هتفهمها
في نظرات كتير هتخدعك
دنيا السركي - القاهرة
ذكريات
معايا
شوية ذكريات وحاجات
عن امبارح
معايا حتتين تفصيل
قماش دبلان
وشنطة ومقلمة وبراية
وسن رصاص واستيكة
مخبيهم بقالي زمان
ومعايا
حاجة م العطار
قال إيه عشان محسود
بخور جاولي وسن الفيل
وعين جني وعرق لبان
ومبخرة وحبة فحم
وكام كلمتين تعاويذ
وأمي مصدقة النسوان
هتعمل زار
وعندي حاجات من الماضي
منديل وورداية وكمان دبدوب
وكارت معايدة فيه مكتوب
حبيب القلب
وعندي كلمتين حايرين
راكبين علي شفتي المراجيح
بقالهم سنة وشهرين
مش عيب إني أبقي صريح
لو خبيت يوم عنك
حقيقه عشتها امبارح
وأيام عشتها تفاريح
عن البنت اللي ف الجامعة
قابلتني وحبتني
عشنا فترة زي الناس
خلصنا ونسيتني
أول مره تسرقني
عينين م الناس
أول مرة يأسرني
قليب حساس
يسكني وأسكن فيه
باقولك إيه
عندي ذكريات عنك
من امبارح
عن حرفي اللي أنا كتبته
فصدقتيه
وشدك ليه
مدينا إيدينا لبعض
ضميتك وع الشفتين
مضينا العقد
وصبينا العصير علي بعض
ف البقين
بقينا كوكتيلين غيرنا
بقولك إيه
هاكون ضيف ليوم عندك
ف حاولي تطمني قلبك
ميستعجلش ف البدايات
سعيد الجبالي - مصري مقيم بالكويت