تصريحات المسئولين

لسانك حصانك إن صنته صانك، ولسان المسئول، يحتاج دائما إلي لجام، حتي لا تأتي تصريحاته بما يسيء فهمه، أقول ذلك بمناسبة تصريح رئيس الجهاز المركزي للتعبئة العامة والإحصاء، الذي قال فيه إن المواطن يكفيه 322 جنيها شهريا، للبقاء علي قيد الحياة ، بناء علي دراسات لأساتذة تغذية، وهو خط الفقر الغذائي، بالبلدي كده تعالوا نحسبها، المواطن محتاج 3 وجبات في اليوم، إفطار وغداء وعشاء، حنقول مكوناتهم لا تشمل أي رفاهية، لا دسم ولا محمر أو مشمر، ولا فاكهة، يبقي محتاج كام في اليوم، وطبعا مفروض إنه مواطن خرافي، أو سوبر لا يمرض ولا يحتاج إلي دواء، المواطن البسيط الغلبان، لو عايز يفطر محتاج إيه، رغيف وشوية فول وطعمياية- علي رأي فؤاد المهندس، في مسرحية أنا فين وانت فين- دول بكام، مستحيل وسط موجة الغلا اللي بتزيد يوم ورا يوم تكون تكلفة الوجبة دي أقل من 5 جنيه، نيجي للغدا، حنقول زي الفطار، والعشا زيهم كمان، يبقي المواطن الغلبان محتاج 15 جنيه في اليوم، يعني 450 في الشهر، رئيس الجهاز أضاف، أن هناك مرحلة أعلي يدخل فيها المسكن والملبس والمواصلات وهي خط الفقر المادي ب482 يعني زود للملبس والسكن والمواصلات مبلغ 162 جنيه، نيجي للمواصلات حيركب المترو بجنيه رايح وجنيه جاي، علي اعتبار إنه من اللي ساكنين فوق محطة المترو علي طول، يعني مش محتاج إنه يمشي ويركب مواصلة تانية، أو إنه يمشي كل يوم كيلو ولا اتنين، يعني 60 جنيه في الشهر، طيب حيسكن ويلبس بكام، نسيب دي لتقدير الناس وحالة وأسعار الإيجارات القديمة والجديدة، طبعا وأكيد كثير منكم حيقول هما الغلابة والبسطاء عايشين إزاي، أقول لكم، عايشين بالستر والبركة والتكافل، وأهي بترزق، هما عايشين، ولسان حالهم بيقول، لأي مسئول مش حاسس بيهم، خليك إنت في برجك العاجي، وسيبنا في حالنا، الله يرضي عنك.