شوبير يدافع عن جنش: الكلام ده خوض في الأعراض

دافع الإعلامي أحمد شوبير، عن محمود عبدالرحيم "جنش" حارس مرمى الزمالك، المعار إلى نادي فيوتشر.
وقال شوبير عبر برنامجه على قناة "أون تايم سبورتس": "ماله جنش؟ أصله كان حارس مرمى الزمالك، طيب وماله؟ هيعمل إيه جنش؟ هو بيلعب باسمه وباسم ناديه، بالتالي عايز يظهر بأحسن وأرفع وأعلى مستوى".
وتابع: "هل ده هيقلل من حب جمهور الزمالك له؟ هو الطبيعي أن لاعب لما يلعب قدام ناديه القديم، عشان يبين أنه بيحبه، فيبقى متهاون؟ أكيد لأ، بالتأكد هيستميت لعمل مباراة جيدة، عشان يأكد بأحقيته لحراسة مرمى منتخب مصر أو الزمالك أو نادي فيوتشر".
وأكمل: "الكلام ده بيزعل وبيضايق، ده خوض في الأعراض، أنت بتتكلم في عرض وشرف واحد، عيب الكلام ده، جنش أو عواد أو الشناوي أو الهاني سليمان أي حد، يعني هو شريف إكرامي لما بيلعب مع بيراميدز قدام الأهلي يسيب عشان الجمهور يحبه؟ ولا يموت نفسه عشان الجمهور يحترمه، عيب الكلام الكتير اللي طالع ده، والتوفيق في الآخر بتاع ربنا".
ويلتقي الزمالك مع فيوتشر في التاسعة مساء اليوم الخميس على إستاد السلام، في الجولة السابعة والعشرين لمسابقة الدوري المصري الممتاز.